Timu ya Vijana Serengeti Boys yachapwa 2-0 na wenyeji Kongo Brazaville mjini Brazaville.

Hussein Twaha wa Serengeti, akiwatoka wachezaji wa Kongo Brazzaville katika mchezo wa kwanza mjini Dar es Salaam. Picha kutoka Maktaba ya BIN ZUBEIRY

Na Prince Akbar

NDOTO za Watanzania kuishuhudia timu yao ya taifa ya vijana chini ya umri wa miaka 17, Serengeti Boys inacheza Fainali za Afrika mwakani nchini Morocco, jana zimeota mbawa baada ya kufungwa mabao 2-0 na wenyeji Kongo Brazaville mjini Brazaville, Kongo, hivyo kutolewa kwa jumla ya mabao 2-1.

Hata hivyo, katika mchezo huo wenyeji waliwafanyia vurugu Watanzania tangu mwanzo wa mchezo ili kuwavuruga kisaikolojia, ingawa hata hivyo vijana walipigana uwanjani na wanastahili sifa.

Katika vurugu hizo, Meneja wa Serengeti alipigwa na mashabiki kabla ya mchezo na hata wakati mchezo ukiendelea Kocha Msaidizi wa Serengeti, Jamhuri Kihwelo ‘Julio’ naye alipigwa na Polisi wa Kongo.

Kwa ujumla mazingira hayakuwa mazuri uwanjani na kutolewa kwa Serengeti leo hakukuwa kwa kimchezo, bali ubabe wa Wakongo, ambao katika mchezo wa kwanza walipokewa vizuri na kufanyiwa ukarimu wa hali ya juu mjini Dar es Salaam wiki mbili zilizopita.

Katika mchezo wa awali, Serengeti ilishinda 1-0 kwenye Uwanja wa Taifa, Dar es Salaam, bao pekee la beki Mudathir Yahya Abbas kwa shuti la mpira wa adhabu kutoka umbali wa mita 22 na mpira kabla ya kutinga nyavuni ulimbabatiza beki mmoja wa Kongo na kumpoteza njia kipa Ombandza Mpea Joe na kujaa nyavuni.

Faulo hiyo ilitokana na kiungo wa Serengeti, Hussein Twaha Ibrahim ‘Messi’kuangushwa na beki Okombi Francis wakati akiwa analekea kwenye eneo la hatari la Wakongo.

chanzo:www.bongostarz.com