Jihadhari: Wanatapeli kwa kutumia maeneo na majina ya Ofisi za Serikali

Wimbo la utapeli limevamia kwa kasi ya ajabu katika mkoa  wa Iringa baada ya  wananchi kutapeliwa kupitia ofisi ya Mkurugenzi Mtendaji wa Halmashauri ya Manispaa ya Iringa, Theresia Mahongo na Mkuu  wa Mkoa  wa Iringa Dk Christine Ishengoma.

Matapeli hao  wamekuwa  wakiwapigia  watu mbalimbali simu na kuwataarifu kuwa katika  Ofisi hizo za viongozi wa Manispaa ya Iringa kuna pikipiki zimetolewa na Rais Jakaya  kikwete kwa ajili ya maofisa ugani na kuwa wao wamebahatika kuzipata mbili  hivyo wameamua kuziuza kwa bei ya Shilingi milioni 2.5 na kama mteja anahitaji afike ofisini hapo kulipa  pesa hiyo ili  apewe pikipiki na hati yake.

Inadaiwa kuwa baada ya  wateja kufika hapo, wamekuwa wakiambiwa  watoe  pesa hiyo nje ya Ofisi kisha wakatafute usafiri wa kubeba pikipiki hizo. Hapo ndipo  wanapokuwa wametapeliwa na matapeli hao  kutoweka. Waliotapeliwa wanaporudi ndipo hukumbwa na mshangao.

Matukio hayo yametokea kwa nyakati tofauti katika uzio wa Ofisi za Manispaa ya Iringa na ofisi ya Mkuu  wa Mkoa ambapo watu  watatu  wametapeliwa.

Kijana mmoja wa Kiwere alitapeliwa zaidi ya Shilingi laki mbili za mauzo ya nyanya kwa matapeli  hao kujifanya  ni maofisa wa polisi wanaofanya msako wa fedha  za mzungu  zilizoibwa jana, hivyo wanakagua fedha za kila mwananchi na  hivyo kutaka fedha za mkulima huyo ili kuchunguzwa.  Mtu huyo aliambiwa asubiri nje ya ofisi za Manispaa ya Iringa na hali akifanya hivyo, matapeli hao walitokea mlango wa  pili na kukimbia.