MAN UNITED JEURI: DAVID MOYES KUPEWA PAUNI MILIONI 200 ZA USAJILI

MANCHESTER United inaandaa kitita kizito kwa kocha wake David Moyes ili kufanya fujo za usajili.Moyes atakuwa na jeuri ya pauni milioni 200 kutoka kwa familia ya Glazer. Ashindwe mwenyewe kusuka timu.

Hata hivyo mashabiki wa Manchester United itabidi wasubiri hadi msimu wa kiangazi, kwani kitita hicho si kwaajili ya usajili wa dirisha dogo.

Kitendo cha United kudondosha pointi kwenye Ligi Kuu hadi kuwa nyuma kwa pointi 11 dhidi ya vinara Arsenal, kumefanya mashabiki wake wawe na taharuki na wanachotaka wao ni kuona usajili kabambe unafanyika mwezi huu wa Januari.

Manchester United wikiendi hii ilijikuta ikitolewa mapema kwenye michuano ya FA baada ya kipigo cha bao 2-1 kutoka kwa Swansea.
Leo usiku watakuwa na kibarua kingine wakati watakapokabiliana na Sunderland katika mechi ya Capital One.

Katika usajili uliopita, United ilikuwa inajiandaa kupeleka ofa ya pauni milioni 90 kwa Gareth Bale huku pia wakiwa na dhamira ya kumrejesha Cristiano Ronaldo lakini wakaishia kumsajili Marouane Fellaini kwa pauni milioni 27.

Miongoni mwa wachezaji wanaotajwa hivi sasa kuwaniwa na Moyes ni pamoja na kiungo Marco Reus (pichani juu mwenye jezi ya njano na nyeusi) kutoka Borussia Dortmund mwenye thamani ya  £30m.

CREDIT: SALUTI 5