Walimu wamlipua JK..Mukoba ahofia kufikwa yaliyomkuta Ulimboka

WAKATI walimu wamesitisha mgomo wao, Chama Cha Walimu (CWT) kimetilia shaka hukumu iliyotolewa na Mahakama Kuu Kitengo cha Kazi kwamba ina mkono wa Rais Jakaya Kikwete.

CWT imesema inatilia shaka hukumu hiyo kwa madai kuwa maneno aliyoyatumia Jaji Sophia Wambura kusoma hukumu iliyobatilisha mgomo wa walimu, inafanana na kauli ya Rais Kikwete aliyoitoa siku moja kabla, wakati wa mkutano wake na wahariri wa vyombo vya habari uliofanyika Ikulu.

Akizungumza na waandishi wa habari jana jijini Dar es Salaam, Rais wa CWT, Gratian Mukoba, alisisitiza kuwa Rais Kikwete aliingilia kati hukumu hiyo kwani katika mazingira ya kawaida, kauli yake isingepaswa kufanana na ya Jaji Wambura.

“Rais Kikwete alichokiongea ndicho ambacho kimetolewa na kutekelezwa na Jaji Wambura. Inaonyesha wazi kwamba kulikuwa na mawasiliano kati yake na jaji ili kutimiza malengo ya serikali,” alisema.

Hata hivyo, Mukoba alisema kuwa wanatii hukumu hiyo na kuwaagiza walimu wote nchini kurudi kazini kuanzia jana ili kutekeleza majukumu yao, na maagizo mengine yatatolewa baada ya kuipitia hukumu.

Kuhusu kulipa fidia ya hasara ambayo serikali inadai kuipata kutokana na mgomo huo, Mukoba alisema chama chake kinasubiri taarifa rasmi ya serikali kwani hakina uwezo wa kufahamu hasara iliyotokana na mgomo wao.

Mukoba alisema chama hicho kitaendelea kupigania madai ya walimu na kuhakikisha serikali inayatekeleza kwa kuwa hata hukumu iliyotolewa haikupingana na madai yao.

Rais huyo ambaye ni mwalimu wa Shule ya Sekondari Benjamin Mkapa ya jijini Dar es Salaam, alisema anashangazwa na taarifa ya Rais Kikwete kudai kuwa madai ya walimu hayatekelezeki wakati fedha hizo za mishahara zikigawanywa kwa usawa kila mtumishi atapata kwa haki.

Alisema kuwa hukumu hiyo imewakatisha tamaa walimu pamoja na kurudi kazini, huku ikionesha dhahiri kuwa serikali haiwajali kutokana na madai yao kutopewa kipaumbele.

Akinukuu maneno ya hayati Mwalimu Julius Nyerere, Mukoba, alisema: “Mwalimu alisema kuwa mganga wa kienyeji mara zote huvaa ngozi ya simba ili kuwatisha wagonjwa, hivyo hata serikali inatangaza madai ya walimu hayalipiki ili Watanzania wakubaliane nao.

“Hata siku moja mgomo halali hauwezi kutokea hapa nchini kwa kuwa sheria zinapindishwa, lakini nchi nyingine sheria hizi ndizo zinazotumika, na hata hivyo wenzetu wapo wazi na kujua kile serikali zao zinachoingiza kuliko ilivyo hapa kwetu,” alisema.

Rais huyo, alisema kwa takwimu za GDP (kiwango cha ukuaji uchumi) zilizopo zinaonesha kuwa ni asilimia 41 tu inatumika kwa ajili ya mishahara wakati asilimia 59 zinatumika kulipana posho, hivyo alishauri kuwa kama serikali ni sikivu, ipunguze viwango vya posho.

“Siku zote ukitaka kumchinja kobe lazima umvizie, ukimjumlisha lazima atarudisha shingo yake ndani, hivyo serikali inapotaka ipewe taarifa za mgomo mapema ni sawa na kuwaambia wajiandae kuukabili,” alisema.

“Ukiona watoto ndani ya nyumba wanapiga kelele basi ujue hakuna amani na wakifikia hatua ya kupiga kelele nje ujue kuwa wamemchoka mzazi wao. Ndivyo ilivyo kwa walimu,” alisisitiza.

Kuhusu kuwapo kwa taarifa za baadhi ya walimu kutoa mafundisho ya masomo kwa kupotosha kwa makusudi, alisema CWT haina uwezo wa kulizuia hilo, na kama serikali inataka kudhibiti tabia hiyo ni bora iharakishe mazungumzo yake na walimu.

Akizungumzia suala la ulinzi na usalama wao, Mukoba alisema CWT ina wasiwasi na viongozi wao walioitisha mgomo na kuitaka serikali kuwahakikishia usalama wao yasije yakawakuta yaliyomtokea kiongozi wa Jumuiya ya Madaktari nchini, Dk. Steven Ulimboka aliyetekwa, kupigwa na kujeruhiwa na watu wasiojulikana.

“Nashukuru Mungu sijapelekwa kule ambako Dk. Ulimboka alifikishwa,” alisema Mukoba huku akicheka.

Julai 29, mwaka huu CWT ilitangaza mgomo wa walimu nchi nzima hatua ambayo ilipingwa na serikali na baadaye ilikimbilia mahakamani kuuzuia.

Juzi, Jaji Wambura alisema mgomo huo ni batili kwani haukuzingatia matakwa ya kifungu cha 84(1), (2) cha Sheria ya Ajira na Mahusiano Kazi ya mwaka 2004.

Kutokana na uamuzi huo, Jaji Wambura alimtaka mdaiwa (Chama cha Walimu Tanzania - CWT) aliyetangaza mgomo huo kutumia vyombo vya habari kueleza kuwa mgomo huo ni batili pamoja na kuwataka walimu kurejea kazini mara moja.

Katika hatua nyingine, hukumu hiyo imepingwa vikali na wananchi, viongozi wa vyama vya wafanyakazi pamoja na vyama vya siasa mkoani Mwanza, na kusema mahakama hiyo haijawatendea haki walimu.

Wakizungumza na mwandishi wa habari hizi jana kwa nyakati tofauti, viongozi na wananchi hao walieleza kusikitishwa na amri hiyo ya mahakama dhidi ya madai ya walimu, na kwamba hukumu za namna hiyo zinaweza kuvuruga amani ya taifa.

Walisema, hawaoni sababu ya mahakama hiyo kuzuia mgomo huo wa walimu wa kushinikiza kulipwa nyongeza ya mishahara na posho zao, hivyo wao wanaona hali hiyo imelenga taifa kuendeleza matabaka ya watumishi wanaolipwa mishahara minono na wanaolipwa kwa kiwango cha chini.

Katibu wa Shirikisho la Vyama vya Wafanyakazi (TUCTA) Mkoa wa Mwanza, Ramadhani Mwendwa na Katibu wa Chama cha Demokrasia na Maendeleo (CHADEMA), mkoani hapa, Wilson Mushumbusi kwa ujumla wao waliipuuza hukumu hiyo, kwa madai kuwa imeeegemea upande wa serikali.

Habari na  Betty Kangonga