RAIS DILMA ROUSSEFF KUIONGOZA TENA BRAZIL

Rais wa Brazil kutokachama cha Wafanyakazi, Dilma Rousseff.

Dilma Rousseff amejipatia ushindi kwenye duru ya pili ya uchaguzi wa rais nchini Brazil, baada ya kumshinda kwa taabu hasimu wake wa kisiasa  Aecio Neves aliyegombea kwa tiketi ya Brazilian Social Democracy Party (PSDB) kwa asilimia 51.6 ya kura zilizopigwa.
Tume ya Taifa ya Uchaguzi ya Brazil  imetangaza kuwa, Neves amejipatia asilimia 48.4 ya kura zote zilizohesabiwa. Jumla ya watu milioni 143 waliotimiza masharti ya kupiga kura walishiriki kwenye duru ya pili ya uchaguzi wa rais nchini Brazil.
Rousseff kutoka chama cha Wafanyakazi, amefanikiwa kujipatia ushindi kutokana na uungaji mkono mkubwa wa tabaka la watu masikini, ambao wamezikubali sera za chama hicho katika kushughulikia masuala ya kijamii.

Aliyekuwa mgombea kwa tiketi ya Brazilian Social Democracy Party (PSDB), Aecio Neves.

Sera za serikali ya Rais Rousseff zimeweza kuwatoa watu milioni 40 kutoka kwenye lindi la umasikini, na kuwaweka katika maisha ya wastani. Dilma Rousseff mwenye umri wa miaka 66 alichaguliwa kwa mara ya kwanza kuiongoza Brazil mwaka 2010, na katika duru ya kwanza ya uchaguzi iliyofanyika 5 Oktoba mwaka huu, alijipatia asilimia 41.5 ya kura na mpinzani wake Neves kujipatia asilimia 33.5 na hivyo uchaguzi huo kulazimika kuingia duru ya pili.