Dude: Usiingize sanaa kwenye ndoa yako

Kulwa Kikumba ‘Dude’.

KWAKO Kulwa Kikumba ‘Dude’. Habari za siku ndugu yangu. Kitambo kidogo hatujaonana ana kwa ana, labda kwa kuwa wote tupo bize na ndiyo maana leo nimekukumbuka kupitia barua.

Ukitaka kujua afya yangu, mimi sijambo. Hofu na shaka ni kwako wewe uliye mbali na upeo wa macho yangu. Vipi wanao wote hawajambo? Shemeji je?

Dhumuni la barua hii ni kutaka kukueleza kwamba nimeona tatizo katika maisha yako ya kawaida. Umekuwa ukiingiza maigizo kwenye ndoa yako.

Mara kadhaa umewahi kunaswa na magazeti Pendwa ukiwa katika pozi tata na msanii mwenzako, Ester Kiama.

Mara nyingi umekuwa ukikanusha kwamba hauna uhusiano wa kimapenzi na msanii huyo zaidi ya kufanya naye kazi. Mimi sikubaliani na hilo. Unauongopea umma.

Mazingira yanakuhukumu. Haiingii akilini mtu ambaye mnafanya naye kazi, kila wakati mnakuwa ‘beneti’ hata katika shughuli ambazo si za kikazi.

Mbaya zaidi nimewahi kumnukuu akidai wewe ni mtu wake wa karibu, unayehakikisha kwamba gari lina mafuta. Eti wewe ni ‘fundi’ wake, hata gari likiharibika.

Umewahi kukutwa nyumbani kwa Ester, inasemekana huwa mnapika na kupakua nyumbani kwake. Wewe ni baba wa familia. Una mke, iweje uiache familia uende kula na wakati mwingine kulala kwa msanii mwenzako? Si busara.

Kitendo tu cha wewe kwenda kupima Ukimwi na Ester kilichoripotiwa katika vyombo vya habari wiki iliyopita, kilitosha kuthibitisha mlikuwa na uhusiano gani. Sasa kwa nini uendelee kuishi katika mazingira ya aina hii?

Imefika hatua kweli hata mkeo anaamua kuondoka nyumbani kutokana na wewe kukolea kwa Ester? Unataka kuifanya jamii iamini kwamba maisha ya wasanii ndivyo yalivyo. Kwamba yale mnayotuonesha katika sinema, kubadilisha wanawake ndiyo maisha yenu?

Nakushauri ndugu yangu, kutokana na muda mrefu ulioishi na mkeo, huna sababu ya kuishi ‘kihunihuni’. Tulia na mama. Una familia yenye watoto saba, walee wanao. Maisha ya kimjinimjini hufanani nayo.

Wanao wanakutazama. Wewe ndiyo dira. Ukionesha njia mbaya, watajifunza nini kutoka kwako? Nakuamini, kwa kuwa shemeji amesharidhia kurudi nyumbani, onesha mapenzi.

Dumisha penzi lako na mfurahie maisha yenu kama ilivyokuwa hapo awali.

Ni matumaini yangu utakuwa umenielewa. Fanyia kazi hayo yote na kamwe usikubali sanaa unayoifanya kwenye video iingie katika maisha yako ya kawaida.

Ni mimi nduguyo,

..................

Erick Evarist