BASATA kuzipamba nyumba kwa sanaa

BARAZA la Sanaa la Taifa (BASATA) kwa kushirikiana na Shirikisho la Sanaa za Ufundi nchini liko mbioni kuzindua kampeni itakayolenga kujenga msukumo wa kulipamba taifa na sanaa mbalimbali nyumbani.

Akizungumza wiki hii kwenye kikao cha awali cha maandalizi ya kampeni hiyo kilichofanyika makao makuu ya BASATA Ilala Sharifu Shamba jijini Dar es Salaam, Katibu Mtendaji wa baraza hilo Ghonche Materego alisema kuwa, lengo ni kuhakikisha maeneo ya miji, majiji, manispaa, ofisi, mahoteli na mazingira mbalimbali yanaona umuhimu wa kununua sanaa za nyumbani na kuzitumia kupamba.

“Hatujapamba kabisa kwa sanaa zetu, maeneo mengi ya miji, kuta za maofisi, nyumba zetu na kadhalika ni matupu. Ni wazi kunahitajika msukumo wa kipekee katika kuhakikisha tunaipendezesha nchi yetu kila mahali kwa kutumia sanaa zetu mbalimbali,” alisisitiza Materego.

Alisema inasikitisha kuona Tanzania ikiwa ni nchi iliyojaliwa vipaji vingi na yenye historia ya pekee katika Sanaa za Ufundi haijatumia mapambo ya sanaa kama ilivyotarajiwa.

“Inatakiwa kuta za nyumba, maeneo ya wazi, pamoja na majengo mbali mbali yapambwe kwa kazi zetu za sanaa, ni ajabu kuona miji mbali mbali haijapambwa mtu unatembelea, fukwe, maofisi, shule, majumba, mahoteli na maeneo mengine lakini unakuta yamepambwa kwa kuigiza Umagharibi,” alisema Materego.

Alitumia fursa hiyo kutoa pongezi kwa Ikulu na Rais Jakaya Kikwete kwa kutilia mkazo mapambo ya sanaa za nyumbani na kutoa wito kwa ofisi nyingine za umma kuiga mkakati huo kwani ni aibu kutumia sanaa za nje kupamba.

Alisema nchi ya Tanzania ni miongoni mwa mataifa yanayovuma kwa sanaa za ufundi duniani kama: Michoro, vinyago, ususi na kadhalika lakini pamoja na utajiri huo bado sanaa hizi hazijathaminiwa nchini.