Vurugu zaibuka Msongola

VURUGU zimeibuka katika mtaa wa Mbondole, Kata ya Msongola, Manispaa ya Ilala, Dar es Salaam, baada ya wavamizi kuingia katika eneo lililotengwa kwa ajili ya ujenzi wa shule na kugawana maeneo kwa ajili ya kujenga makazi ya kudumu.

Tukio hilo lilitokea jana baada ya kikundi cha watu wasiofahamika kuvamia eneo hilo na kutenga makazi yao huku wakiligawa katika vipande vya mita 20 kwa 20 kwa ajili ya wenzao ambao hawajawasili.

Mwenyekiti wa Tawi la Kulutini (CCM), Sefu Mbinga aliieleza Tanzania Daima kuwa vurugu hizo zilisababisha wananchi wa eneo hilo na Chakenge kushirikiana na kuungana kwa vita ili kulichukua eneo hilo kwa nguvu.

“Mbali na wavamizi hao kujipanga kuliteka eneo hilo, lakini bado walidhamiria kuwadhuru wananchi, hivyo tulifanikiwa kujipanga vizuri kwa kuchukua silaha kama mapanga, visu, sululu na nyingine, ili kuwadhibiti,” alisema Mbinga.

Naye Katibu wa kamati ya uvamizi, Daniel Zacharia alisena waliamua kuingia eneo hilo baada ya kubaini kuwa ni pori na halimilikiwi na mtu au taasisi yoyote.

Kwa upande wake, Mkurugenzi Manispaa ya Ilala, Gabriel Fuime, alibainisha kutopewa taarifa kuhusiana na sakata hilo, ila aliahidi kulifuatilia na baadaye kulitafutia ufumbuzi wa kina.