Waziri Mkuu. Mizengo Pinda awaongoza wananchi katika mazishi ya Mwl. James Irenge

Waziri Mkuu akiwasili katika uwanja wa ndege wa Musoma tayari kuelekea Kijijini Busegwe kwa mazishi

Waziri Mkuu akisalimiana na viongozi mbalimbali wa Mkoa wa Mara wa Vyama na Serikali

                         Kaburi la Mwalimu James Irenge aliyezaliwa mwaka 1892 na kufariki 2012

 Waziri Mkuu Mizengo Pinda hii leo amewaongoza maelfu ya wakazi wa Mkoa wa Mara katika Mazishi ya Mwalimu James irenge aliyemfundisha Baba Wa Taifa Hayati Mwalimu Julius Nyerere mwaka 1935 katika Shule ya Msingi Mwisenge iliyoko katika Manispaa ya Musoma. Marehemu Mwalimu Irenge amezikwa leo katika kijiji alichozaliwa cha Busegwe Nyanza, Wilayani Butiama kwa heshima zote za Kiserikali.

Marehemu alizaliwa mwaka 1892 katika kijiji cha Busegwe, mwaka 1924-1925 alisoma Standard two Busegwe, Mwaka 1927 alisoma darasa la pili, Mwisenge middle school, Mwaka 1932 alijiunga na Chuo cha Ualimu Mpwapwa, 1934 alifundisha Chuo cha Ualimu Mpwapwa, 1935 alihamia Shule ya Msingi 

Mwisenge ambapo alikutana na Hayati Baba wa Taifa na kumfundisha darasa la tatu na la nne akiwa anaishi naye Mtaa wa Mkinyerero, Mwisenge. Marehemu alistaafu mwaka 1970 akiwa mkaguzi wa Shule za Msingi katika Wilaya za Geita na Biharamuro.

Baada ya kustaafu Hayati Baba wa Taifa alimshauri aanzishe Kijiji cha Ujamaa ambacho kiliitwa Ihayabuyaga huko Geita, Mwanza. Mwaka 1980 alirejea nyumbani kwake Mwisenge. Marehemu ameacha Mjane, watoto kumi na wajukuu 35, vitukuu 4 na vilembwe wawili.

Paschal Michael, Musoma.
www.wotepamoja.com