Fainali Redd’s Miss Mwanza 2012 Ijumaa

WAREMBO wanaowania taji la Redd’s Miss Mwanza 2012, wanatarajiwa kupanda jukwaani Ijumaa, kwenye Ukumbi wa Yacht Club, jijini hapa.

Kwa mujibu wa mratibu wa shindano hilo, Peter Omar, maandalizi yapo sawia, hivyo akawataka watu kujitokeza kwa wingi kushuhudia fainali za aina yake siku hiyo.

 “Ninaposema kila kitu kipo vizuri, namaanisha hata kambi. Kusema ukweli kambi ya Miss Mwanza mwaka huu ni matawi ya juu. Warembo wapo vizuri na huduma pia ni za kiwango kizuri. Kimsingi kambi ya mwaka huu imepandisha hadhi ya shindano letu,” alisema.

Kwa upande mwingine, Omar alisema wakongwe wa taarab nchini, Malkia Khadija Kopa na gwiji Mwanahawa Ali, wanarajiwa kuoneshana nani mkali wa vijembe vya mwambao kwenye shindano la Miss Mwanza 2012.

“Miss Mwanza ya mwaka huu ni funga kazi. Watakaokuja Yacht Club, watashuhudia shoo kali ambayo haijawahi kutokea. Kwanza kabisa tuna warembo wazuri. Hii ina maana kwamba Miss Tanzania wa mwaka huu, atatokea Mwanza.

“Tuna timu nzuri ya wanamuziki watakaotumbuiza. Mpambano wa Khadija Kopa na Mwanahawa Ali, haujawahi kutokea Mwanza.

“Kuna wanamuziki wengine wakali watakuwepo akiwemo Bob Haisa ambaye kwa zaidi ya miaka 14, amebaki kuwa mmoja wa mabalozi bora wa Kanda ya Ziwa kwa upande wa muziki wa kizazi kipya,” alisema.