MUUMIN AITOSA TWANGA?

WINGU zito limetanda kuhusu nini kinachoendelea kwa mwimbaji wa Twanga Pepeta, Mwinjuma Muumin ndani ya bendi hiyo.

Muumin hajaoneka kwenye jukwaa la Twanga kwa wiki nzima huku baadhi ya wapenzi wa bendi hiyo wakianza kuwa na hisia tofauti kuwa pengine mwimbaji huyo ameachia ngazi.

Saluti5 iliongea na Muumin kwa njia ya simu Jumamosi iliyopita ambapo alisema ameomba mapumziko mafupi ili akamilishe baadhi ya mambo yake binafsi.(CHANZO CHA HABARI SALUTI5 -www.saluti5.com)

Muumin maarufu kama Kocha wa Dunia amesema baadhi ya mambo yaliyoko usoni mwake ni mambo ya kifamilia sambamba na kutengeneza wimbo mmoja wa taarab.

Muumin ambaye kwa muda mrefu amekuwa akinukuliwa kuwa ipo siku ataimba taarab amesema tayari amekamilisha mashairi ya wimbo wake na kazi ya kutengeneza muziki amemkabidhi Ali Jay “Mwarabu wa Dubai”.

Mapema mwaka huu Muumin alinukuliwa na luninga ya ITV kupitia kipindi cha Sham sham za Pwani akisema panapo uhai kabla ya mwaka huu kwisha atakuwa ametoa wimbo wa taarab na hivyo maandalizi yanayoendelea hivi sasa yanadhihirisha kutimia kwa kauli yake hiyo.

Hata Hivyo Muumin alisema hana mpango wa kuachana na Twanga wala kuhamia kwenye muziki wa taarab bali anataka kuhudhihirishia umma kuwa yeye ni Kocha wa Dunia kwa kuimba miziki ya aina yote.

Muumin amesema hakuna haja ya kuandikia mate wakati wino upo, watu wajiandae na wategemee changamoto mpya kutoka kwake.

Alisema kabla ya kuamua kustaafu muziki atahakikisha pia anatoa albam ya Bongo Fleva.

Muumin amesema kwa sasa yupo nyumbani kwao Bagamoyo amepumzika kwaajili ya matatizo ya kifamilia sambamba pia na maandalizi ya kazi ya taarab.

Saluti5 imepanga kumtembelea Muumin baadae leo huko Bagamoyo ili kujua kwa kina nini mipango yake ya baadae na pia mapumziko yake yanaisha lini. Stay tune.