HATIMAE MUUMIN AIHAMA RASMI TWANGA PEPETA.

HATIMAE mwimbaji maararufu wa muziki wa dansi, Mwinjuma Muumin ameihama rasmi Twanga Pepeta.

Akiongea na saluti5 usiku wa jana kuamkia leo, mwimbaji huyo alisema kwa nia njema kabisa bila ugomvi wala mgogoro wowote ameihama Twanga Pepeta na kujiunga na bendi changa ya Victoria Sound yenye maskani yake jijini Dar es Salaam.Muumin amesema kesho Jumatano atakwenda Idara ya Habari (Maelezo) kuongea na Waandishi wa habari.

Mapema jana mchana saluti5 ilimtembelea Muumin nyumbani kwao Bagamoyo (kama picha zinavyoonyesha hapo juu) ambapo licha ya kuongea mengi lakini alikataa kuzungumzia uvumi uliozagaa kuhusu kuhama kwake Twanga Pepeta.

“Mimi hadi muda huu bado ni mwanamuziki wa Twanga ila baadae nitakuja town (Dar es Salaam), tutafutane usiku pengine nitakuwa na kitu tofauti cha kukueleza” alisema Muumin katika maongezi yake na saluti 5 jana mchana.

Hatimae saluti5 ikakutana tena na Muumin saa 6:45 jana usiku jijini Dar es Salaam na ndipo alipoweka mambo hadharini kuwa ameihama rasmi bendi aipendayo sana ya Twanga Pepeta.

“Ni uamuzi mgumu sana, naipenda Twanga Pepeta, nilipata malezi mazuri kuanzia kwa uongozi, wanamuziki, maseneta hadi mashabiki.

“Kibinaadamu najua ziko sehemu kadhaa ambazo tulikwazana lakini sitapenda mazuri mengi niliyoyapata pale yafunikwe na mabaya machache, itakuwa ni ukosefu wa fadhila, naomba wote watakaoumizwa na kuhama kwangu wanisamehe na tulindiane heshima.

“Haitakuwa jambo jema mimi au Twanga Pepeta tukaanza kupita huku na kule na kuchafuana, bado naichukulia Twanga na Aset kwa ujumla kama nyumbani kwangu” alisema Muumin.

Alipoulizwa ni kwanini ameihama Twanga wakati aliahidi kumalizia muziki wake kundini hapo, Muumin alisema amezingatia vitu viwili.

Kwanza ni dau alilopewa Victoria Sound, pili ni uchanga wa bendi aliyojiunga nayo. “Naiona Victoria kama bendi changa ambayo haitaweza kuwa bendi shindani kwa Twanga Pepeta, kamwe nisingethubutu kujiunga na bendi yeyote shindani kwa Twanga” alisema Muumin aliyetunga wimbo Penzi la shemeji katika albam ya Dunia Daraja.

Aidha, Muumin aliongeza kuwa anaamini kuwa kuondoka kwake Twanga Pepeta hakutaacha pengo lolote kwa vile ina mkusanyiko wa wanamuziki wenye vipaji vya hali ya juu.

Muumin amesema changamoto aliyonayo sasa ni ya kutengeneza nyimbo nzuri kwa bendi yake mpya ili kuitoa katika hatua moja kwenda hatua nyingine.

Kuondoka kwa Muumin Twanga Pepeta kunahitimisha wingu zito lililokuwa limetanda kufuatia kutoonekana kwake jukwaani wiki nzima iliyopita.

                         CHANZO CHA HABARI SALUTI5