CHADEMA wamvaa Tendwa kikisema kuwa hakiko tayari kutoa maoni kuhusu vurugu zilizotokea hivi karibuni mjini Dodoma.

CHAMA cha Demokrasia na Maendeleo (CHADEMA) kimemwandikia barua kali Msajili wa Vyama vya Siasa, John Tendwa, kikisema kuwa hakiko tayari kutoa maoni kuhusu vurugu zilizotokea hivi karibuni mjini Dodoma.

Sababu kubwa iliyotajwa na chama hicho ni kwamba suala hilo ni la kijinai na msajili hana mamlaka ya kushughulikia makosa ya namna hiyo.

Msimamo huo wa CHADEMA unakuja siku chache baada ya Tendwa kupitia barua yake ya 05/02/2013, yenye Kumb. Na. AB.115/123/01A/45 kumtaka Katibu Mkuu wa chama hicho, Dk. Willibrod Slaa, atoe maoni yake juu ya vurugu zilizotokea mwishoni mwa juma lililopita.

Katika vurugu hizo wanachama wa CCM, wakiwemo viongozi, wabunge na makada waandamizi, waliwavamia na kuwashushia kipigo wanachama na viongozi wa CHADEMA.

Vurugu hizo zilitokea eneo la Mwanga Bar baada ya wafuasi wa CCM wakiongozwa na mbunge wa Tabora Mjini, Ismail Rage, kung’oa mlingoti na kushusha bendera ya CHADEMA kisha kufanya mkutano wa maadhimisho ya miaka 36 ya kuzaliwa chama hicho.

CHADEMA katika barua hiyo ambayo imesainiwa na Idara ya Sheria ya chama hicho kwa niaba ya katibu mkuu wake, yenye Kumb. Na. C/ADMMSJ/04/04 ya 06/02/2013, wanasema chama hakiwezi kutoa maoni yake, kwa sababu suala hilo ni la kijinai.

Viongozi wake mkoani Dodoma, wameshafungua mashtaka, hivyo kumtaka Tendwa awasiliane na mamlaka zinazohusika na makosa ya jinai.

“Nimeagizwa na katibu mkuu nikujulishe kuwa hatatoa maoni kuhusu tukio lililotokea Dodoma siku ya tarehe Februari 3, 2013 kwa kuwa suala hilo ni la jinai na viongozi wa CHADEMA Mkoa wa Dodoma, wameshafungua mashtaka polisi,” ilisomeka sehemu ya barua hiyo.

Batua hiyo inaongeza kuwa kutokana na suala hilo kuwa la jinai, Msajili wa Vyama vya Siasa hana mamlaka ya kulishughulikia.

Vyama vyaweka mkakati

Kufuatia vurugu zinazoendelea kujitokeza kwenye mjadala ndani ya Bunge kati ya wabunge na kiti cha Spika, vyama vya siasa vyenye uwakilishi bungeni jana vilikutana chini ya Waziri Mkuu, Mizengo Pinda, na kuweka mikakati ya kumaliza kasoro hizo.

Katika kikao hicho kilichoitishwa na Mwenyekiti wa Kituo cha Demokrasia Tanzania (TCD), James Mbatia, viongozi wa vyama hivyo waliziagiza mamlaka husika zitafute mchakato wa kuboresha kanuni za Bunge.

Lengo ni kuongeza ufanisi, uwajibikaji na uhuru katika kazi za Bunge na kuhakikisha kuwa kunakuwa na mfumo imara wa kuendesha Bunge la mfumo wa vyama vingi vya siasa.

Akiwasilisha maazimio hayo ya pamoja, Mbatia alisema viongozi hao waliazimia kuwepo kwa uvumilivu wa kisiasa baina ya vyama vyao na wanachama wake katika kutekeleza majukumu yao katika kudumisha amani, mshikamano na maendeleo endelevu kwa manufaa ya taifa.

Alisema kuwa kuna changamoto mbalimbali kama vile vurugu zilivyotokea bungeni  Februari 2 mwaka huu; kwamba vurugu hizo zinatakiwa kutafutiwa ufumbuzi wa kina ikiwa ni kujenga mahusiano mema, haki, usawa pamoja na kasi ya uwajibikaji ndani na nje ya Bunge.

Viongozi wakuu waliohudhuria mkutano huo, mbali na Pinda ni Makamu Mwenyekiti wa  Chama cha Mapinduzi (CCM) Tanzania Bara, Philip Mangula, Naibu Katibu Mkuu (CCM) Tanzania Bara, Mwigulu Nchemba, Mbataia (NCCR-Mageuzi) na Ambar Haji Khamis, Makamu Mwenyekiti (NCCR Mageuzi).

Wengine ni Augustine Mrema na Jeremiah Sherukindo (TLP), Freeman Mbowe na John Mnyika (CHADEMA), John Cheyo na Izack Cheyo (UDP) na Habib Mnyaa na Julius Mtatiro (CUF) na wawakilishi wa vyama visivyo na wabunge, Fahmi Doutwa na Felix Makuwa (UPDP).