Hakuna mgawo wa umeme - TANESCO

SHIRIKA la Umeme Tanzania (TANESCO), limesema kukatika kwa nishati hiyo katika baadhi ya maeneo ya Kinondoni kunatokana na matengenzo ya transfoma iliyopo Ubungo jijini Dar es Salaam.

Akizungumza Kamishna Msaidizi wa Nishati ya Umeme, Innocent Lwoga, alisema kuwa wananchi hawapaswi kuwa na wasiwasi kwa kuwa hakuna tena tatizo la mgawo wa umeme.

Alisema kukatika kwa umeme katika maeneo hayo kumechangiwa na udogo wa transfoma hiyo ambayo hivi sasa imezidiwa na wateja, hasa kuanzia nyakati za saa 12:00 jioni ambapo huduma hiyo hukosekana kutokana na matumizi makubwa.Lwoga alitaja maeneo ambayo yameathirika ni Kimara, Sinza, Changanyikeni, Buguruni, Mabibo, Makongo, Salasala na mengine katika wilaya hiyo.

Alisema shirika hivi sasa linafanya juhudi ya kubadilisha transfoma hiyo na matengenezo kwa ajili ya kuboresha huduma hiyo, ambapo yanatarajiwa kukamilika Februari 15.