Majambazi waua polisi

ASKARI polisi mwenye namba G.68 PC Jafari Karume Mohamed (30), amefariki dunia baada ya kurushiana risasi na watu wanaodhaniwa kuwa majambazi wilayani Chunya mkoani hapa.

Kaimu Kamanda wa Polisi Mkoa wa Mbeya, Barakael Masaki, aliwaambia waandishi wa habari kuwa kifo hicho kilitokea jana katika hospitali ya Wilaya ya Chunya.

Alisema kuwa chanzo cha tukio hilo ni majambazi wanne wakiwa na silaha aina ya SMG kuvamia kituo cha mafuta kilichopo Kijiji cha Matundasi mali ya Samora Muyombe na kupora fedha sh milioni 2.2.

''Majambazi hao walitumia gari lenye namba za usajili T 227 BST aina ya Toyota Corolla iliyokuwa ikiendeshwa na Shaban Msule (33) mkazi wa Makambako mkoani Njombe,'' alisema.

Kamanda aliongeza kuwa, askari huyo aliyeuawa alikuwa doria na wenzake, ndipo wakafuatilia tukio hilo na katika mapambano ya kurushiana risasi, alijeruhiwa kwa kupigwa risasi upande wa ubavu wa kulia na kukimbizwa hospitalini kwa ajili ya matibabu zaidi.

Katika mapambano hayo, mtuhumiwa wa ujambazi, Msule aliuawa kwa kupigwa risasi na gari lililotumika katika tukio hilo lilikamatwa na maganda tisa ya risasi aina ya SMG/SAR na risasi sita ziliokotwa eneo la tukio.

Kamanda Masaki ametoa wito kwa watuhumiwa hao waliotoroka kujisalimisha wenyewe kabla hawajakamatwa kutokana na msako unaoendelea chini ya  Ofisa Upelelezi wa Mkoa (RCO) wa Mbeya, Robert Mayala.