Iran haina ajenda ya kufanya mazungumzo na Marekani

Ramin Mehmanparast Msemaji wa Wizara ya Mambo ya Nje ya Iran

Ramin Mehmanparast

Msemaji wa Wizara ya Mambo ya Nchi za Nje ya Jamhuri ya Kiislamu ya Iran amesema kuwa, suala la kufanyika mazungumzo kati ya Iran na Marekani haliko kwenye ajenda hata ya kiongozi mmoja wa ngazi za juu wa Jamhuri ya Kiislamu ya Iran. 

Akizungumza kwenye kongamano lililohudhuriwa pia na wanafikra wa Kimarekani katika mji wa Mashhad kaskazini mashariki mwa Iran, Ramin Mehmanparast ameongeza kuwa, kwa mujibu wa kalibu iliyoainishwa na Kiongozi Muadhamu wa Mapinduzi ya Kiislamu, mazungumzo na Marekani hayatafanyika hadi pale Washington itakapobadilisha nyendo zake za kiadui na viongozi wa nchi hiyo kuiomba radhi Iran kutokana na siasa zake za chuki dhidi ya taifa la Iran. 

Mehmanparast ameongeza kuwa, suala la kufanya mazungumzo na kunyanyua kiwango cha uhusiano na nchi mbalimbali, ni jambo linalopewa kipaumbele katika siasa za kigeni za nchi yoyote ile ikiwemo Iran na kusisitiza kuwa, kabla ya hapo Marekani mara kadhaa imekuwa ikitaka kufanya mazungumzo na Iran kwa lengo la kutatua migogoro mbalimbali katika eneo kama vile mgogoro wa Afghanistan. 

Mehmanparast  amebainisha kuwa, mazungumzo yanayokwenda sambamba na vitisho, mashinikizo ya kisiasa na kiuchumi kamwe hayana nia njema na kuongeza kuwa, Washington kamwe haiwezi kuwadhibiti wananchi wa  Iran kwa kutumia vitisho, vikwazo  na mashinikizo. Chanco na Radio Iran.