JK aongoza mazishi ya Askofu Laizer

RAIS Jakaya Kikwete jana aliongoza maelfu ya waombolezaji pamoja na marais wastaafu wa Tanzania kwenye mazishi ya Askofu wa Kanisa la Kiinjili la Kilutheri Tanzania (KKKT) Dayosisi ya Kaskazini Kati, Dk. Thomas Laizer, na kumtaja kama kiongozi jasiri na jabali lililoiletea dayosisi hiyo maendeleo makubwa.

Viongozi wengine watakaoshiriki mazishi hayo yaliyofanyika katika eneo lililotengwa katika kanisa la Kiinjili la Kilutheri usharika wa Mjini Kati ni pamoja na Rais mstaafu wa Awamu ya Pili, Ali Hassan Mwinyi, Rais mstaafu Benjamin Mkapa na Waziri Mkuu aliayejiuzulu Edward Lowassa, pamoja na mawaziri, wabunge na viongozi mbalimbali nchini na nje ya nchi.

Mazishi hayo yamelifanya jiji la Arusha kukumbwa na simanzi tangu kiongozi huyo afariki Alhamisi iliyopota katika Hospitali ya Arusha Lutheran Medical Center (ALMC) maarufu kama Seliani iliyoko jijini hapa inayomilikiwa na kanisa hilo.

Rais Kikwete alisema kifo cha Laizer mbali ya kuacha pengo kubwa, mchango wake ulikuwa bado unahitajika kuendeleza yale ambayo aliyaasisi kwa maendeleo ya kanisa hilo.

“Mtu hakumbukwi kwa mali alizoacha bali kwa mema aliyoyatenda akiwa duniani na hakika marehemu Askofu Laizer ni wa kukumbukwa kwani alikuwa jasiri na tuseme kama alikuwa jabali la maendeleo la kanisa la KKKT,” alisema Rais Kikwete.

Askofu Laizer alifariki kwenye hospitali hiyo baada ya kulazwa katika vipindi tofauti kwa maradhi ya saratani ambapo kwa mujibu wa katiba alipaswa kushikilia madaraka hayo hadi 2016.

Mkuu wa kanisa hilo nchini Dk. Alex Malasusa katika mahubiri yake alimtaja marehemu kama shujaa wa imani, huku akiwasihi waombolezaji kujiandaa na safari ya mwisho kwenda mbinguni na kamwe wasijione wote ni wasafi.

Katika mazishi hayo maaskofu 20 toka dayosisi mbalimbali nchini na wachungaji mbalimbali walishiriki ambapo mwili wake ulilala kanisani hapo kuruhusu waombolezaji kutoa heshima za mwisho.

“Mwenyekiti wa chama cha demokrasia na maendeleo (CHADEMA), Freeman Mbowe, akitoa salamu zake; awali alimwomba Katibu Mkuu wa KKKT, Israel Kariongi, amuwie radhi ili aongee japo kwa dakika kumi tofauti na dakika mbili zilizokuwa zimepangwa kwa kudai kuwa ni mara yake ya kwanza katika hafla kama hiyo inayojumuisha Rais, marais wastaafu na waziri mkuu mstaafu na mawaziri kwa wakati mmoja,” alisema Mbowe.

Alisema kuwa msiba ni somo kwamba viongozi wote wa kisiasa hutakiwa kuacha itikadi zao na kujumuika pamoja na kwamba mara ya mwisho alipomtembelea marehemu hospitalini, alimwagiza kusimamia ukweli na kweli hiyo itamlinda.

Marehemu Askofu Laizer alizaliwa Machi 10, 1945 katika kijiji cha Kitumbeine wilayani Longido, mkoa wa Arusha, na alipata elimu yake ya msingi hadi darasa la nane Longido na kuhitimu mwaka 1965. Aliendelea na masomo ya sekondari pamoja na masomo ya theolojia katika chuo cha Makumira kabla ya kusimikwa rasmi kuwa askofu wa kwanza wa Dayosisi ya Arusha ambapo sasa ni Dayosisi ya Kaskazini Kati.