Rage akimbilia TFF..Wanachama nao kupiga hodi Karume leo

WAKATI wanachama wa klabu ya Simba waliouondoa madarakani utawala wa Ismail Aden Rage wakijipanga kuwasilisha ripoti yao Shirikisho la Soka Tanzania (TFF), uongozi umekimbilia katika shirikisho hilo kuomba suluhu.

Wanachama zaidi ya 700, walikutana juzi kwenye Hoteli ya Starlight jijini Dar es Salaam na kuazimia kwa pamoja kuung’oa madarakani uongozi wa Rage, ambapo walitarajia jana jioni au leo asubuhi kuwasilisha ripoti yao TFF na Ofisi ya Msajili wa Vyama na Klabu za Michezo.

Katika uamuzi huo, wanachama hao waliwateua Zacharia Hans Poppe na Rahma Al Kharoos kuongoza klabu hiyo kwa muda hadi watakapopatikana viongozi wengine. Hata hivyo, Poppe katangaza kutotambua uamuzi huo.

Akizungumza  jana, mmoja wa waratibu wa mkutano huo, Ustadh Masudi, alisema kwamba wako katika hatua za mwisho za kuiandaa ripoti hiyo kabla ya kuiwasilisha kwenye mamlaka husika.

“Unajua suala hili ni la kisheria zaidi, hivyo tunahitaji kulifanya kwa umakini mkubwa, kwa sasa tuko katika hatua za mwishomwisho kuandaa hiyo ripoti, tukimaliza tutaiwasilisha hii leo na ikishindakana tutaipeleka kesho,” alisema.

Kuhusiana na Poppe kugomea kuteuliwa kwake, Ustadh alisema kuwa hawalitambui hilo, kwani amefanya hivyo kwa kuzungumza na vyombo vya habari tu na si kuwakatalia wanachama.

“Hapo tunasubiri uamuzi wa kisheria, kama mkutano ulikuwa halali Hans Poppe itabidi aitishe mkutano wa kukana kuteuliwa kwake na sisi tutateuwa wengine,” alisema.

Akizungumzia suala hilo la wanachama jana, Ofisa Habari wa TFF, Boniface Wambura, alisema watatoa tamko watakapoipata ripoti hiyo, huku akibainisha kupokea barua ya uongozi ulioondolewa madarakani.

“Shirikisho la Mpira wa Miguu Tanzania (TFF), limepokea barua kutoka uongozi wa Simba, ikielezea kutotambua mkutano ulioandaliwa na wanaodaiwa kuwa wanachama wake na kufanyika jana (juzi), ukumbi wa Starlight, Dar es Salaam,” alisema.

Wambura alisema vilevile katika barua hiyo, uongozi wa Simba umeahidi kuitisha mkutano wa wanachama wake utakaoitishwa na mwenyekiti wake kwa mujibu wa katiba ya klabu hiyo.

Alisema kutokana na hali hiyo, TFF imeitisha mara moja kikao cha Kamati ya Sheria, Maadili na Hadhi za Wachezaji chini ya uenyekiti wa Wakili Alex Mgongolwa, kwa ajili ya kutoa mwongozo kwa matukio ya aina hiyo.

“Hata hivyo, TFF tunasisitiza kwa wanachama wetu ikiwemo Simba kuwa wanachama wanapotaka kufanya uamuzi wowote ule, wanatakiwa kuzingatia katiba na kanuni zilizopo,” alisema.

Katika mkutano wa juzi, mwenyekiti wa mkutano huo, Dk. Mohamedi Wandwi, alisema kuwa Hans Pope na Rahma Al Kharoos watateua wajumbe wa kuwasaidia na wataitisha mkutano mkuu wa uchaguzi baada ya Ligi Kuu Tanzania Bara kumalizika.

“Ibara ya 16(g) ya Katiba ya klabu ya Simba, inatoa mamlaka ya mkutano huu kuunda chombo kitakachosimamia kuanzia kesho mpaka uchaguzi utakapofanyika, na tumewachagua Zakaria Hans Pope na Rahma Al Kharoos kuongoza kamati ya muda ya Simba mpaka ligi itakapomalizika,” alisema Dk. Wandwi.

Alisema kuwa katiba ya Simba inatoa siku 90 kuitishwa kwa mkutano mkuu wa uchaguzi, lakini kwa kuwa ligi bado inaendelea, wameipa kamati ya muda hadi ligi itakapomalizika kuitisha mkutano mkuu.