Wakuu wa mikoa si watumishi wa umma - Serikali.

SERIKALI imesema wakuu wa mikoa si watumishi wa umma ila ni watumishi wa kisiasa kama ilivyo kwa wabunge.

Waziri wa Nchi Ofisi ya Rais, Menejimenti ya Utumishi wa Umma, Celina Kombani, alibainisha hayo bungeni jana alipokuwa akijibu swali la nyongeza la Mbunge wa Musoma 

Mjini, Vincent Nyerere (CHADEMA), aliyehoji kuhusu ajira za wakuu wa mikoa ambayo si kazi ya kitaalamu na ikizingatiwa kuwa wengi wao walioshika nyadhifa hizo ni wastaafu.

Katika swali la msingi, mbunge huyo alitaka kujua mpango wa serikali wa kusitisha kutoa mikataba kwa wastaafu ili wahitimu wanaotoka vyuoni wapate ajira na kujenga nchi yao.

Akijibu swali hilo, Waziri Kombani alikiri kuwapo kwa wataalamu wengi wanaohitimu vyuo mbalimbali nchini ambapo hupatiwa ajira kulingana na mahitaji ya nchi na pia kwa kuzingatia uwezo wa bajeti ya serikali.

Alisema mikataba hutolewa na serikali inapoonekana ni kwa manufaa ya umma kufanya hivyo kutokana na mahitaji makubwa katika sekta husika.

“Kifungu 12.2 cha waraka wa Rais Na. 1 wa mwaka 1998 kinatamka wazi kwamba endapo utaalamu wa mtumishi unahitajika sana, serikali inawajibika kumwomba mtumishi kuendelea kufanya kazi na si mstaafu mwenyewe kuomba,” alisema Kombani.

Waziri Kombani alisema kwa sasa serikali inawapa mikataba wataalamu wastaafu ambao si rahisi kuwapata katika soko la ajira, hususan wataalamu wa kada muhimu kama vile walimu, waganga, wahandisi na wahadhiri wa vyuo vikuu.

Alisema kutokana na kuhitaji kwao wataalamu hawa wastaafu wanaendelea kutumiwa kwa kuwapa mikataba ya muda mfupi sambamba na kuajiri wahitimu wa vyuo mbalimbali.

Waziri huyo alisema kwa mantiki hiyo serikali itaendelea kuajiri wastaafu katika kada hizo muhimu hadi hapo soko la ajira litakapojitosheleza.