Ni kivumbi Redd’s Miss Mzizima kesho

WAREMBO 15 kesho watapanda jukwaani katika ukumbi wa Hoteli ya Lamada, jijini Dar es Salaam, kuwania taji la Redd’s Miss Mzizima, mwaka 2013.

Kwa mujibu wa msemaji wa Kampuni ya Kowack Brothers inayoratibu shindano hilo, Aneth Makagua, kila mrembo ana shauku kubwa ya kuibuka mshindi na kubeba zawadi.

Aneth alisema zawadi kwa mshindi ni sh 400,000 na sofa yenye thamani zaidi ya kiasi hicho huku wengine wakiondoka na zawadi kemkemu.

“Warembo siku hiyo watapita jukwaani kuonesha urembo na umahiri wao wa mambo mbalimbali kama mitindo na shoo ili kutoa nafasi kwa majaji kuchagua mshindi,” alisema Aneth.

Kuhusu kiingilio, alisema kitakuwa sh 10,000 kwa viti vya kawaida na sh 20,000 kwa viti maalumu na kuongeza kuwa, bendi ya Twanga Pepeta ndiyo itaporomosha burudani.

Naye Mkurugenzi wa Kowack Brothers, Osango Appollo, amewasihi wadau kujitokeza kushuhudia fainali hiyo akisema itakuwa ya kiwango bora.

“Tumepania kufanya makubwa katika kuhakikisha tunatoa warembo bomba ambao watakuwa tishio katika ngazi za juu kuanzia ambazo ni mkoa, kanda hadi taifa,” alisema.

Shindano hilo linafanyika chini ya wadhamini Club Bilicanas, Tesco Funiture, kinywaji cha Chill Will, Tanzania Daima, CXC Africa, Gogo shop, Lakairo Investment, Lamada Hotel, Kampuni ya Bia Tanzania (TBL), kupitia kinywaji cha Redd’s na wengineo.