Biashara haramu ya watu yaathiri laki 6 Afrika

WAKATI mataifa mbalimbali duniani yakipambana kukomesha biashara haramu ya kuuza watu, imeelezwa kuwa ni ya pili kwa ukubwa duniani kufanyika baada ya dawa za kulevya, huku zaidi ya watu laki 6 kutoka Afrika wakiwa waathirika wakubwa.

Takwimu hizo ni kwa mujibu wa Shirika la Umoja wa Mataifa la Madawa ya Kulevya na Uhalifu (UNODC), zinazoeleza kuwa wafanyabiashara wamekuwa wakijipatia kiasi cha dola bilioni 31 kwa mwaka na kwamba hadi kufika mwaka 2011 watu milioni 2.5 duniani kote walishauzwa.

Katika mahojiano maalum na Tanzania Daima, Msemaji wa Shirika la Uhamiaji Duniani (IOM), Jumbe Omar Jumbe, alisema katika biashara hiyo nchi ya Ukraine na zile za Uarabuni ndizo zinazoongoza.

Aliongeza kuwa watu wanaofanya biashara hiyo kutoka nchi hizo wamekuwa wakiwakusanya watu na kuwauza katika maeneo mbalimbali.

Katika Afrika, Jumbe alisema nchi zinazojishughulisha zaidi na biashara hiyo ni Morocco, Sudan na Uganda huku akibainisha kuwa tatizo hilo limekuwa gumu kugundulika Tanzania kwa kile alichoeleza kuwa matajiri wa biashara hiyo wanakaa nchi za nje na kuwatumia mawakala kufanikisha shughuli zao.

Jumbe alitaja sababu za watu kukubali kuuzwa kuwa ni pamoja na tamaa ya kutafuta maisha bora na kubainisha kuwa wengi wanaofikishwa katika maeneo waliyouzwa wanakuta mambo ndivyo sivyo na kutaja kundi linaloathirika kwa kiasi kikubwa kuwa ni la wanawake.

Alisema imekuwa ngumu kukomesha biashara hiyo kutokana na wafanyabiashara hiyo kuwa na fedha nyingi wanazotumia kuwahonga watumishi wasio waaminifu kufanikisha mbinu zao.

Hivi karibuni Shirika la Umoja wa Mataifa la Wakimbizi Duniani (UNHCR) kwa kushirikiana na IOM, liliandaa semina ya siku mbili ya kuwajengea uwezo waandishi wa habari kuhusu masuala ya wakimbizi na wahamiaji, iliyofanyika jijini Dar es Salaam huku biashara ya binadamu ikiwa moja ya mada zilizojadiliwa.

Ofisa Mwandamizi wa UNHCR, Edmond Kamina, alisema lengo la semina hiyo ni kujenga mahusiano ya karibu na mashirika hayo na kuwajengea uwezo waandishi kuandika kuhusu masuala hayo.