Watuhumiwa wawili ndugu wa Kenya wafichua siri..

RAIA wawili ndugu wa Kenya, Mark Rubila (16) na Sila Rubila (21) wanaodaiwa kumuua dereva teksi, Ramadhani Mahembe (38) mkazi wa Buguruni Chama, wameanza kufichua siri mbalimbali kuhusu matukio mbalimbali ya ujambazi ambayo wamekuwa wakiyafanya.

Kwa mujibu wa chanzo chetu ndani ya Jeshi la Polisi, Wakenya hao kutoka mji wa Kakamega wameshafanya matukio mengi ya ujambazi yakiwamo ya uporaji magari.

“Wahenga wanasema siku za mwizi ni arobaini, hivyo ndivyo inavyodhihirika kwa Wakenya hao ambao wamefichua siri zaidi kuhusu ujambazi waliokuwa wakiufanya na kueleza kuwa gari walilotaka kumpora marehemu Mahembe walitaka kulipeleka mkoani Tanga kwa mteja.

“Hao vijana ni wadogo kiumri lakini wanaonesha ni hatari sana kwani wameeleza kuwa wameshafanya matukio mengi yakiwamo ya kuiba magari mengi, walipoulizwa ilipo Toyota Hilux walisema walilificha sehemu mkoani Tanga,” kilieleza chanzo kingine.

Baada ya kubanwa zaidi inadaiwa kuwa watuhumiwa hao waliwaeleza polisi kuwa awali walimpelekea mteja gari aina ya Toyota Hilux na alilikataa na kuwaeleza kuwa anataka gari dogo.

Chanzo hicho kinadai kuwa watuhumiwa hao walitaja watu kadhaa ambao wamekuwa wakishirikiana nao.

Siku za hivi karibuni matukio ya ujambazi yamekuwa yakiliandama Jiji la Dar es Salaam mfululizo kwa benki za watu binafsi kuporwa mamilioni ya fedha.