TAZARA bado kugumu.. hali Bado tete.

WAKATI hali ikiwa tete wafanyakazi wa Mamlaka ya Reli Tanzania na Zambia (TAZARA) wanaoendelea na mgomo wa kusotea malipo yao, suala hilo jana lilitinga bungeni na kuibua tafrani kubwa.

Akizungumza Katibu wa Chama cha Wafanyakazi wa Reli (Trawu) Kanda ya Dar es Salaam, Theresia Mahagatila, alithibitisha kuendelea kwa mgomo huo kutokana na uongozi wa TAZARA kuwadanganya wafanyakazi.

Licha ya TAZARA kuahidi kulipa malimbikizo hayo ya mshahara ya miezi minne ifikapo Agosti 29 mwaka huu, ahadi hiyo imeota mbawa na badala yake imelipa mshahara wa mwezi wa tano pekee.

“Sisi tulifika ofisini tayari kwa kazi siku hiyo kama walivyotangaza kwenye vyombo vya habari, cha kushangaza tumelipwa mshahara wa mwezi wa tano tu na waliolipwa ni baadhi yetu,” alisema.

 Makuu ya TAZARA jana na kukuta wafanyakazi hao wakiwa kwenye makundi huku huduma zote zikiwa zimesimama.

Wakati hali ikiwa hivyo TAZARA, mjini Dodoma, Bunge nusura zisimame baada ya mbunge wa Viti Maalum, Suzan Kiwanga (CHADEMA), kutaka shughuli zisitishwe ili lijadili kufukuzwa kazi kwa wafanyakazi hao.

Kiwanga alibainisha kuwa kufukuzwa kazi kwa wafanyakazi hao kunawafanya baadhi ya wananchi hususan wa mikoa ya Kusini kujawa na hofu ya reli hiyo kuhujumiwa na hivyo uchumi wa mikoa hiyo kutetereka.

Mbunge huyo mara baada ya kumalizika kwa kipindi cha maswali na majibu, aliomba mwongozo wa Spika kwa mujibu wa Kanuni za Bunge kifungu cha 47 (1) na 48 inayolitaka Bunge kusitisha shughuli zake ili kujadili jambo zito litakalowasilishwa na mbunge.

Kiwanga alibainisha kuwa kufukuzwa kazi kwa wafanyakazi hao kumemfanya asipate usingizi na familia zaidi ya 9,000 zimeathirika.

Alisema kuwa alipigiwa simu nyingi na wananchi baada ya wafanyakazi 1,500 wa TAZARA kufukuzwa wakihofia uchumi wao kuporomoka.

“Ninaliomba Bunge liahirishe shughuli zake ili lijadili jambo la TAZARA kwa kuwa linagusa maslahi ya wananchi wengi.

“Hivi jamani tuwe wakweli tungefanyaje kama sisi wabunge tungekuwa hatujalipwa mishahara yetu kwa miezi minne, tungekubali?” alihoji.

Kiwanga alibainisha kuwa anashangazwa na hatua zilizochuliwa na menejimenti ya TAZARA (Tanzania) kuwafukuza kazi wafanyakazi wake wakati wenzao wa Zambia waliwalipa wafanyakazi wao waliogoma kwa siku nne.

Mbunge huyo alihoji kwa nini serikali ya Tanzania ina kigugumizi cha kuzungumzia jambo hilo au kutekeleza mahitaji ya wafanyakazi.

“Zambia waligoma kwa muda wa siku nne na walitimiziwa stahiki zao lakini Tanzania hali imekuwa sivyo, inasuasua kwenye suala hilo linaloweza kusababisha uchumi wa nchi kuporomoka kutokana na athari za mgomo huu, kwa nini tumefikia hapa?” alisisitiza.

Baada ya Kiwanga kumaliza kuomba mwongozo huo, Naibu Spika Ndugai, alimtaka Waziri wa Nchi Ofisi ya Waziri Mkuu (Sera, Uratibu na Bunge), William Lukuvi, kutoa ufafanuzi kuhusu sakata hilo.

Lukuvi alisema kuwa menejimenti ya TAZARA imefuta uamuzi wa kufukuzwa kwa wafanyakazi hao na serikali itatoa taarifa bungeni kulingana na nafasi ya Bunge.