Fainali Bibi Bomba kesho.

FAINALI ya shindano la Bibi Bomba inatarajiwa kurindima kesho huku washiriki watano wakifanikiwa kutinga hatua hiyo.

Akizungumza na waandishi wa habari jijini Dar es Salaam jana, Meneja Miradi wa Clouds Tv, Sakina Lyoka, alisema kesho kipindi cha Bibi Bomba kitakuwa kinakamilisha msimu huu wa pili.

“Fainali kubwa itafanyika pale ukumbi wa Escape 1 Mikocheni, fainali hii itahusisha mabibi bomba watano tu waliofanikiwa kufika hadi mwisho wa shindano,” alisema Lyoka.

Aidha, Lyoka alisema mshindi wa kwanza atazawadiwa sh milioni 12 na wengine kupewa zawadi nono.

“Kipindi cha Bibi Bomba hufanyika mara moja tu kwa mwaka, kikihusisha kumtafuta bibi aliye bora kuliko wenzake ndani ya shindano, kutokana na vigezo mbalimbali,” alisema Lyoka.

Aliongeza kuwa mwaka huu kipindi hicho kimetimiza mwaka wa pili, kikiwa kimehusisha washiriki 11 kutoka sehemu mbalimbali nchini ambao walipatikana katika mchujo mkubwa uliofanyika viwanja vya Leaders Club Kinondoni, Dar es Salaam.

Washiriki waliofanikiwa kuingia tano bora ya Bibi Bomba ni Tabitha Tungaraja, Chiku Omary, Mgeni Ibrahim, Veronica Kayombo na Agatha Mahinya.