Yanga yampa Twite milioni 40

Beki wa kimataifa wa Yanga, Mbuyu Twite.

Wilbert Molandi na Sweetbert Lukonge
UONGOZI wa Klabu ya Yanga umefanikisha usajili wa beki wake kiraka Mbuyu Twite kwa dau la dola milioni 25 (sawa na shilingi milioni 40).
Kiraka huyo juzi Jumatatu alisaini mkataba wa mwaka mmoja kwa ajili ya kuichezea timu hiyo itakayoshiriki Kombe la Shirikisho Afrika  na Ligi Kuu Bara.
Kwa mujibu wa rafiki wa karibu wa beki huyo, wamefikia muafaka wa usajili huo baada ya pande hizo mbili kukubaliana kusaini mkataba kwa dau hilo la fedha.

Rafiki huyo alisema kuwa, beki huyo amesajiliwa kwa mkataba wa mwaka mmoja kutokana na mapendekezo ya aliyekuwa kocha mkuu wa timu hiyo, Mholanzi, Hans van Der Pluijm.
Aliongeza kuwa, katika kipindi hicho cha mwaka mmoja, beki huyo atapokea mshahara wa shilingi milioni mbili kwa mwezi kwa mujibu wa makubaliano yaliyokuwepo.
“Mwanzo uongozi na beki huyo walikubaliana kusaini mkataba wa miaka miwili, lakini baadaye wakamsainisha mwaka mmoja baada ya kocha (Pluijm) kupendekeza hilo.
“Amepewa mwaka mmoja kwa ajili ya kuangalia uwezo wake kwenye msimu ujao na kama akionyesha kiwango kikubwa basi ataongeza mkataba mwingine,” alisema rafiki huyo.
Alipoulizwa katibu mkuu wa timu hiyo, Beno Njovu, alisema: “Kiwango cha fedha tulichompa Twite ni siri kati ya mchezaji na uongozi, hivyo sipo tayari kutaja kiwango hicho cha fedha tulichompa aongeze mkataba.”