Geilson Santana ‘Jaja’ akishangilia goli na wachezaji wenzake.TAMKA jina Jaja upate fedha! Tamka jina la Jaja uwape Yanga furaha! Tamka jina Jaja upate shangwe Jangwani! Mara baada ya mechi dhidi ya Azam FC kwenye Uwanja wa Taifa, jana jijini Dar es Salaam, Wanayanga wote walikuwa wakitamka jina la straika huyo Mbrazili aliyekuwa msaada mkubwa kwa timu yao kupata ushindi wa mabao 3-0.
Yanga imetwaa Ngao ya Jamii baada ya kuifunga Azam idadi hiyo ya mabao huku Geilson Santana ‘Jaja’ akifunga mabao mawili, moja likiwa la ufundi kiasi kwamba kuna mashabiki wa timu pinzani walisimama na kumpigia makofi.
Kwa ushindi huo wa kuukaribisha msimu mpya wa 2014/15, Yanga imeamsha morali ya mashabiki wake ikiwa ni siku chache baada ya kupata pigo la kumpoteza Emmanuel Okwi ambaye ametua Simba.
Yanga ikiongozwa na Kocha Marcio Maximo raia wa Brazil katika mchezo huo uliojaza watu kibao, ilionyesha soka zuri licha ya kubanwa katika kipindi cha kwanza na Azam ambao ni mabingwa watetezi wa Ligi Kuu Bara.
Azam ilianza mchezo huo kwa kasi huku kukiwa na mashambulizi ya kupokezana pamoja na kosakosa za hapa na pale, lakini mpaka dakika 45 za kipindi cha kwanza zinakamilika, hakuna timu iliyoona lango la mwenzake.
Mrisho Ngassa wa Yanga ambaye alibadilishana jezi na nahodha wa Azam, Salum Abubakar ‘Sure Boy’ wakati wa kuelekea mapumziko, alikuwa na makeke kadhaa kwenye kipindi hicho lakini alikuwa akikutana na kigingi cha beki mwenye mwili uliojengeka kimazoezi, David Mwantika.
Mpaka wanaenda mapumziko, Jaja alikuwa amepiga pasi 8, mipira ya vichwa 5, akiotea mara 2, ambapo pasi moja iliharibika, tofauti na straika wa Azam, Didier Kavumbagu ambaye alipiga pasi 11, vichwa 2, mashuti 2 golini lakini hakuotea.
Yanga walianza kufurahi katika dakika ya 56 baada ya Jaja kuunganisha pasi nzuri ya Simon Msuva huku mabeki wa Azam wakibaki wanatazamana.
Furaha ikiwa haijapoa, Jaja aliipatia Yanga bao la pili baada ya kufunga kiufundi katika dakika ya 65. Alipata mpira ndani ya 18, akafanya kama anapiga shuti, kipa wa Azam, Mwadini Ally, akajiandaa, lakini Mbrazili huyo akapiga kwa ‘kuuchop’ kidogo, hivyo Mwadini kujikuta akiutazama ukimpita kwa juu na kuingia wavuni taratibu.
Baada ya hapo, Yanga iliendelea kucheza soka zuri lakini alikuwa ni Jaja ambaye alipata shangwe nyingi hasa baada ya kupiga pasi za visigino, vitendo vilivyokuwa vikisababisha mashabiki kulipuka kwa furaha.
Simon Msuva alihitimisha furaha ya Yanga baada ya kufunga bao lililotokana na makosa ya Mwadini ambaye alienda kuupiga mpira akaukosa, kitendo kilichomfanya Msuva kubaki na lango, akautupia mpira kama hataki.
Katika mchezo huo kulikuwa na mabadiliko kadhaa kwa timu zote ambapo Yanga iliwatoa Said Juma na kuingia Hassan Dilunga, Nizar Khalfan akaingia Msuva, Jaja akapumzika na kumpisha Hussein Javu, Haruna Niyonzima alimpisha Hamis Kiiza.
Azam alitoka Leonel akaingia Hamis Mcha, Himid Mao alitoka na kuingia Kelvin Friday, Erasto Nyoni alipumzika na kuingia Gadiel Michael, Kipre Tchetche alimpisha Ismail Diarra.
Moja ya matukio yaliyowashangaza wengi ni kitendo cha Leonel raia wa Haiti alipotolewa kupitiliza moja kwa moja vyumbani badala ya kukaa kwenye benchi kama wenzake.
Baada ya mchezo kocha Marcio Maximo alisema: “Nafurahia ushindi na nawashukuru mashabiki waliojitokeza, Azam wana kikosi kizuri lakini nafurahi tumepata ushindi.”
Kwa upande wake Jaja alisema, “Nimefurahi baada ya kufunga mabao haya, nitajitahidi kuhakikisha kila mechi nafunga mabao.”
AZAM: Mwandini Ali, Erasto Nyoni, Shomari Kapombe, David Mwantika, Aggrey Morris, Michael Balou, Himid Mao, Salum Aboubakar ‘Sure Boy’, Didier Kavumbagu, Kipre Tchetche na Leonel Saint-Preux.
YANGA: Deogratius Munishi ‘Dida’, Juma Abdul, Oscar Joshua, Nadir Haroub ‘Cannavaro’ Kelvin Yondani, Mbuyu Twite, Said Juma, Haruna Niyonzima, Genilson Santana ‘Jaja’, Mrisho Ngassa na Nizar Khalfan.
CHANZO: CHAMPIONI
No comments:
Post a Comment