POLISI, WAANDISHI NANI WAZUSHI UTEKAJI WATOTO DAR?

WIKI iliyopita vyombo vya habari likiwemo gazeti la hili viliandika habari ya Jiji la Dar es Salaam kutikiswa na wimbi la utekaji watoto ambao wamekuwa wakichukuliwa katika mazingira ya kutatanisha huku wengine wakiuawa na kunyofolewa sehemu zao nyeti.
Msingi wa habari hiyo ulikuwa ni kutoa tahadhari kwa wazazi na vyombo vya dola kuchukua hatua ya kujilinda na uhalifu huo mpya.
Lakini pamoja na wema wa habari hizo, Jeshi la Polisi Mkoa wa Kipolisi wa Kinondoni kupitia kwa kamanda wake Camilius Wambura, waliziita habari hizo kuwa ni za kizushi huku wakionya kuwachukulia hatua wanaoeneza uzushi huo.
Tafakuri ya kawaida kuhusu onyo la uzushi huo iliwahusu waandishi wa habari wakiwemo wa gazeti la hili. Kusudio la polisi kwenye tamko hilo linaweza kuwa na tafsiri nyingi lakini moja kati ya hizo ni kuwaambia wananchi wawapuuze waandishi.
Wakati sura ya jeshi la polisi hasa Kinondoni ikiwa na picha hiyo ya uzushi wa waandishi, tukio la mwanafunzi wa darasa la kwanza Shule ya Msingi Msingwa iliyopo Kimara-Temboni, wilayani Kinondoni jijini Dar eneo la kazi la Kamanda Wambura, alitekwa mwishoni mwa wiki iliyopita, akauawa kisha kunyofolewa sehemu zake za siri.
Katika mazingira hayo swali la mzushi ni nani kati ya waandishi wa habari na polisi limepata jibu. Hata hivyo, haliwezi kuwa jambo la kufurahia kupata ushindi wa uzushi bila kujiuliza kasumba ya polisi kuwaita waandishi wazushi kaianzisha nani na kwa manufaa gani.

Vita ya kugombea fito kwenye ujenzi wa nyumba moja kaibuni nani? Maana ushirikiano kati ya jeshi la polisi na waandishi unazidi kuzorota kila siku, hakuna anayeona hatari inayolikabili taifa siku za usoni kama hali hii itaendelea kuota mizizi.
Ni juzi tu waandishi wa habari wamepigwa na polisi wakati wakitekeleza majukumu yao, mzozo umepoa kimtindo lakini moshi ungali ukifuka.Hata kama jeshi la polisi halitaki kushaurika kwa dalili zinavyojionesha hivi sasa kwa waandishi kuhojiwa, kutishwa na kusukwasukwa kwa baadhi ya habari kutafsiriwa vibaya na jeshi hili;  bado wanahabari wana jukumu la kuitumia jamii bila hofu.
Ushauri wangu kwa jeshi la polisi lenye sura hii ni kwamba, haliwezi kupata mafanikio ya kweli ya kuwalinda raia na mali zao bila kuwa na ushirikiano wa kutosha na vyombo vya habari. Hilo naweza kuliapia!
 Taarifa za matukio zimekuwa zikiripotiwa kwa wingi zaidi kwenye vyombo vya habari kuliko polisi ambako kumejaa lawama za “ukipiga simu hawapokei” na woga wa watoa habari kugeukwa pindi wafikishapo ripoti zao polisi.  Anayebisha katika hili shauri yake.
Wahariri ni mashahidi wa hiki nisemacho, wao wamekuwa watu wa kwanza kupewa taarifa za ajali licha ya kuwa siyo trafiki, huambiwa habari za wauza madawa ya kulevya ingawa wao siyo polisi, watu kujihusisha na ujambazi hata kama wao siyo askari kanzu! Yote hii ni ushahidi wa kuaminika kwao.
Sasa ukiona jeshi la polisi halitaki ushirika na waandishi wenye wingi wa taarifa za matukio kama nilivyosema ni dhahiri kwamba hawataki pia kupata ripoti zitakazowasaidia kufanikisha ulinzi wao kwa jamii.
Mwenye hasara ni nani,  ni waandishi au polisi wenye jukumu la ulinzi? Vyombo vya habari viliandika utekaji watoto vikamaliza kazi yake, Wambura alipokuja na kauli ya uzushi leo yeye ndiye anayenyooshewa vidole, siyo waandishi. Ningekuwa kijana ningesema Wambura anatakiwa kujiongeza.
Nachochea tu!