NINGEKUWA MIMI PROFESA TIBAIJUKA NISINGEFUMBIA MACHO UOZO HUU KATIKA ARDHI

Waziri wa Ardhi, Nyumba na Maendeleo ya Makazi, Profesa Anna Kajumulo Tibaijuka.

Kwako Waziri wa Ardhi, Nyumba na Maendeleo ya Makazi, Profesa Anna Kajumulo Tibaijuka.
Najua bado hujatulia kutokana na ziara ya kushtukiza ya Mbunge wa Kawe, Halima Mdee jimboni kwako, Muleba Kusini ambapo amemwaga ‘upupu’ kwa wapiga kura wako. Sijui lengo la ziara yake jimboni kwako ni nini lakini leo sitaki kuzungumzia hilo.

Pamoja na wakati mgumu ulionao kutokana na matatizo lukuki ya ardhi yanayokuhusu moja kwa moja kwa sababu wewe ndiye waziri mwenye dhamana katika masuala yote ya ardhi, nataka kukufikishia ujumbe wangu kwako.

Mimi sikuzaliwa Oktoba 12, 1950 katika Kijiji cha Kangaviyo mkoani Kagera kama wewe. Nakuapia sina CV kubwa kama wewe, sijawahi kufundisha Chuo Kikuu cha Dar es Salaam tangu mwaka 1993 hadi 1998 kama wewe.

Sijawahi kupata ‘exposure’ kubwa ya kimataifa kama wewe, sijawahi kufanya kazi katika Shirika la Umoja wa Mataifa la UN-Habitat wala sijawahi kuzunguka sehemu nyingi duniani, nikishika nyadhifa mbalimbali kama wewe.

Mimi ni mlalahoi tu, mbumbumbu nisiyejua chochote kuhusu mambo ya kimataifa wala serikali na utawala kama wewe. Hata hivyo, hilo halinizuii kukufikishia ujumbe wangu kwako.

Najua kwamba wewe ni mwanamke mchapakazi, uliyesoma na mwenye uwezo wa kuongoza ndiyo maana umeshika nyadhifa mbalimbali kwa nyakati tofauti, kuanzia Umoja wa Mataifa mpaka kwenye Serikali ya Tanzania. Naamini umepata uzoefu mkubwa wa namna ya kuongoza na kuzitatua kero mbalimbali zinazowakabili watu unaowaongoza.

Hata hivyo, mbona unashindwa kuonesha uzoefu na uwezo wako katika wizara unayoiongoza? Kuna matatizo mengi sana yanayohusu ardhi katika nchi hii, nikianza kuyaorodhesha, gazeti zima litajaa na bado hayataisha.

Ina maana huyajui matatizo haya? Hujui kero zinazowakumbwa wananchi wa Mbarali kwenye shamba la mpunga la Kapunga? Huyajui matatizo ya ardhi yanayowakabili wananchi wa Kigamboni? Vipi kuhusu mgogoro wa muda mrefu wa Chasimba na Chatembo, Kinondoni jijini Dar es Salaam?

Vipi kuhusu mapigano ya wakulima na wafugaji katika Bonde la Mto Rufiji na mkoani Morogoro? Ulianzisha mkakati kabambe wa kubomoa mahekalu ya watu waliojenga kwenye fukwe za bahari na uoto wa mikoko lakini mbona nyumba zilizobomolewa zilikuwa ni za ‘akina mwenzangu na mimi’ tu wakati mahekalu ya vigogo bado yamesimama?

Sitaki kuamini taarifa zinazoeleza kuwa unamiliki ekari zaidi ya 800 katika Kijiji cha Kyamnyorwa wilayani Muleba katika jimbo lako. Sitaki kuamini kama ni kweli na wewe unamiliki ekari za kutosha eneo la Kigamboni. Naamini wewe ni mzalendo, unawapenda Watanzania na ndiyo maana uliamua kuachia wadhifa mkubwa Umoja wa Mataifa na kurudi kuwatumikia wananchi wa Muleba.

Lakini mbona unashindwa kuyashughulikia matatizo haya yanayowakera wengi? Viwanja vya wazi karibu asilimia kubwa vimeshavamiwa na kujengwa ‘mijengo’ ya maana, kwa nini unalifumbia macho hili?
Kwa bahati mbaya mimi nitabaki kuwa mimi na sitaweza kuwa wewe lakini kama ningekuwa mimi kwenye nafasi yako, kwa hii migogoro ya ardhi inayoendelea nchi nzima, narudia tena kusema bila kumung’unya maneno kwamba nisingeifumbia macho, ningechukua hatua haraka sana.

Pengine hii ndiyo ingekuwa alama kwa wananchi wangu juu ya uaminifu wao kwangu kwa nyadhifa nyingine kubwa zaidi maana nasikia unataka kuchukua kiti cha urais katika uchaguzi mkuu ujao.
Wasalaam!

CREDIT: GLOBAL PUBLISHERS