DUCE wavamia Bodi ya mikopo

Chuo Kikuu Kishiriki cha Elimu Dar es Salaam (DUCE)

Wanafunzi wa mwaka wa kwanza na wa pili wa Chuo Kikuu Kishiriki cha Elimu Dar es Salaam (DUCE), jana walileta mtafaruku katika ofisi za Bodi ya Mikopo baada ya kuvamia wakidai fedha za kujikimu wawapo kwenye mazoezi ya vitendo.

Wanafunzi hao ambao wako kwenye mitihani ya kujiandaa kwenda kwenye mazoezi ya vitendo, walifika katika bodi hiyo jana asubuhi kuishinikiza bodi hiyo kuwapatia fedha zao.

Kutokana na uvamizi huo, uongozi wa bodi ulilazimika kuwasiliana na polisi wilaya ya kinondoni ili kuwasaidia ulinzi, ambapo polisi wa kutuliza ghasia walifika wakiwa kwenye gari moja.

Kutokana na kuimarishwa kwa ulinzi katika eneo la ofisi za bodi hiyo, wanafunzi hao walijikusanya na kukubaliana kutuma wawakilishi wawili kuonana na uongozi wa bodi hiyo.

Wawakilishi hao, Daniel Amos na Vedastus Maindi, baada ya kuonana na uongozi wa bodi, walirejea kwa wenzao kuwaeleza nini walichokubaliana.

Hata hivyo ilichukua muda hadi wawakilishi hao kuelewana na wenzao wakati wakitoa taarifa ya nini walichokubaliana na uongozi wa bodi.