JK: Jukumu la kulea watoto ni letu sote

RAIS Jakaya Kikwete amewataka Watanzania kuachana na fikra potofu kuwa jukumu la kuwalea watoto wanaoishi katika mazingira magumu ni la Serikali peke yake.

Akizungumza katika Sherehe ya Maadhimisho ya Siku ya Mtoto wa Afrika, zilizofanyika  jijini Dar es Salaam, juzi, Rais Kikwete alisema serikali inapaswa kushirikiana na wazazi na jamii kwa ujumla katika kuhakikisha kwamba watoto wote wa Tanzania wanapata haki zao. “Watoto wanahitaji kupewa matunzo, afya njema na elimu. Hili ni jukumu la wazazi, jamii na Serikali kwa ujumla,” alisema Rais Jakaya.

Alisema watoto wanahitaji kusaidiwa ili na endapo makundi hayo yatatoa huduma kwa watoto kwa usawa wataishi katika mazingira mazuri.Rais Kikwete aliwataja pia viongozi wa dini kuwa nao wana nafasi ya kipekee katika kuielimisha jamii ili kuondokana na tatizo la watoto wa mitaani.Alisema watoto wengi wanakufa barani Afrika kutokana na mazingira magumu ya kukosa mahitaji muhimu ikiwamo chakula na maji.

Lakini akaonya kuwa matatizo mengine yanachangiwa na mila potofu za baadhi ya makabila, hivyo akasema huu ni wakati wa kubadilika na kuachana na mambo ambayo hayajengi jamii bali kuibomoa.
“Watoto wengi wanakufa barani Afrika kwa kukosa mahitaji muhimu… Mila potofu,” alisema Rais Jakaya na kuongeza kuwa;.

 "Ni jukumu la kila Mtanzania kuona ni namna gani anaweza kuchangia kutatua tatizo hilo kulingana na nafasi aliyo nayo katika jamii,".Naye, Rais Mstaafu wa Awamu ya Pili, Alhaji Ali Hassan Mwinyi alisema Tanzania ina rasilimali za kutosha ambazo zinaweza kusaida kuondoa tatizo la njaa na magonjwa.

Mwinyi alisema jamii yenye watoto wajinga haiwezi kuwa na mtazamo wa kimaendeleo.
Alishukuru Serikali kwa kuandaa maadhimisho hayo yenye malengo ya kuondoa umasikini barani Afrika na kumlinda mtoto aweze kupata matunzo muhimu kwenye jamii.“Naamini kupitia maadhimisho haya, tutahakikisha tunaongeza juhudi za kuondoa umasikini na kuwa na mbinu ambazo zitasaidia watoto  na kuwaepusha kuingia kwenye mazingira magumu,” alisema Mwinyi.

Maadhimisho ya Siku ya Mtoto wa Afrika huadhimishwa kila mwaka Juni 16 ikiwa ni kumbukumbu ya mauaji ya kinyama waliyofanyiwa watoto nchini Afrika Kusini mwaka 1976 wakati wakiandamana kupinga ubaguzi wa rangi.