Wadau 100 wa elimu kushiriki maonesho

WADAU wa elimu zaidi ya 100 kutoka nchi wanachama wa Jumuiya ya Afrika Mashariki wanatarajiwa kushiriki maonesho ya elimu yanayotarajiwa kufanyika Julai 10 hadi 13 mwaka huu kwenye Viwanja vya Nanenane jijini hapa.

Katika maonesho hayo, Katibu Mkuu wa Jumuiya ya Afrika Mashariki, Dk. Richard Sezibera anatarajiwa kuwa mgeni rasmi katika hafla ya ufunguzi huo.

Mratibu wa maonesho hayo, Neema Kaaya kutoka Kampuni ya East Africa Education Tanzania Ltd aliiambia Tanzania Daima juzi kuwa tayari maandalizi yote yamekamilika.

Alisema kuwa maonesho hayo yatawakutanisha wadau wa elimu wanaojishughulisha na uuzaji wa vifaa vya elimu, vikiwemo vitabu, zana za kufundishia, nguo za wanafunzi, samani za shule pamoja na wamiliki wa shule na vyuo mbalimbali kuanzia shule za awali, msingi, sekondari mpaka vyuo vikuu kutoka Tanzania, Kenya, Uganda, Rwanda na Burundi.

Kaaya aliwataka wananchi kujitokeza kwa wingi wakati wa maonesho hayo ili waweze kupata taarifa muhimu juu ya masuala yanayohusiana na elimu.

Alisema maonesho hayo yanaweza kuwasaidia wazazi kufahamu taarifa mbalimbali kuhusu mfumo wa elimu unaofuatwa kwenye shule mbalimbali, ambazo zitakuwa kwenye maonesho hayo, hivyo kuwawezesha kufanya maamuzi ni wapi wawapeleke watoto wao kupata elimu.

Kaaya alisema kuwa kwenye maonesho hayo wamiliki wa shule na vyuo mbalimbali watapata fursa ya kueleza kwa kina kuhusiana na mambo mbalimbali ya kitaaluma wanayotoa kwenye shule zao, ikiwemo kuweka wazi juu ya sifa za kitaaluma za walimu, wakufunzi na maprofesa walio nao kwenye shule na vyuo vyao.  Habari na Grace Macha, Arusha wa Tanzania Daima.