`Bunge limewasahau wananchi`

Paroko wa Kanisa Katoliki la Kiwanja cha Ndege, mjini Dodoma, Padre Luyembe Sosthenes, amesema wanaotafakari kwa kina mijadala ya Bunge, wanaona kwamba mwananchi anachukua nafasi ya tatu ama hayupo kabisa katika mijadala hiyo.

Aidha, alionyesha kukerwa na neno kambi ya Upinzani, ambalo alisema linaathari katika jamii kwa kuwa lugha huumba. Aliyasema hayo wakati wa mahubiri yake, katika misa ya kwanza aliyoiendesha katika Parokia hiyo, mjini Dodoma.

“Wanaoitafakari kwa kina mijadala ya Bunge mnaweza kuona kwamba mwananchi Mtanzania anachukua nafasi ya tatu au hayupo kabisa kwenye mijadala ya Bunge badala ya yeye kuwa lengo kuu kwa sababu ya mtazamo huo wa wao na sisi,” alisema.

Alitaka kila mmoja kuwa tayari kumsikiliza mwenzake kuthamini na kutaka kuelewa ni namna gani walifikia tafakari hiyo ilikujenga heshima na utu.

Alitolewa mfano wakati mwingine mbunge anatoa hoja yake baadhi huibuka na kumzomea bila ya kumsikiliza nini anachotaka kukiongea.

Kuhusu neno Kambi ya Upinzani, ambalo limekuwa likitumiwa kutenganisha serikali na vyama visivyotawala, Paroko Luyembe alisema neno hilo limekuwa na uhalisia unaoathiri maisha ya kila Mtanzania.

“Naona ugumu kuelewa kuwa kama ni utawala wa watu na uongozi shirikishi na kama watu wote wanashirikishwa then tuongelee kuwa kuna upinzani…Haiingii akilini.”alisema na kuongeza kuwa:

“Upinzani unajitokeza palipo na uvunjwaji wa haki za biandamu. Lakini kama kuna kuheshimu haki za binadamu na utu wa kila mtu, sijui kama kutakuwa na Upinzani.

Alisema katika mgawanyo wa somo la falsafa ya lugha, kuna uchunguzi wa vitu vinne vinavyozingatiwa ambavyo ni uasili wa maana ya neno, matumizi ya lugha, utambuzi wa lugha na uhusiano wa lugha na ukweli lengo kuu ikiwa ni kupata mantiki ya matumizi ya lugha au neno.

Alitaka Watanzania kufikiri neno jingine ambalo litajenga umoja wa kitanzania na kuepusha athari katika jamii.

Via