Njiwa wa Diamond wazua tafrani kwa mashabiki

TUKIO la msanii Naseeb Abdul ‘Diamond’ kutinga Uwanja wa Taifa, jijini Dar es Salaam na njiwa wanne, kwenye Tamasha la Matumaini lililofanyika hivi karibuni, limezua mitazamo tofauti kwa mashabiki, huku wengine wakiingiza imani za kishirikina.

Tanzania Daima, lilishuhudia baadhi ya mashabiki wakirumbana katika gari la abiria, lililokuwa likitoka Ubungo kuelekea Mlandizi, ambako ubishi ulianza mara baada ya dereva wa gari hilo kuweka wimbo wa Diamond, unaokwenda kwa jina la ‘Mawazo’ unaotamba vilivyo hivi sasa hapa nchini.

Huku wimbo huo ukiendelea, kijana mmoja aliyefahamika kwa jina la James Charles, alisema, anampenda sana Diamond, lakini kitendo alichokifanya kinaonesha ishara ya ushirikina, huku akimtaka kuwaweka wazi mashabiki juu ya maana ya kushuka uwanjani na njiwa.“Bwana wewe Diamond ni mkali na mimi binafsi namkubali, ila kitendo cha kuingia na njiwa, binafsi kimenifanya nibaki mdomo wazi, ni vema angetupa tafsiri ya njiwa wale, anaanza kufanya nimuone wa ajabu na mwenye kuamini ushirikina,” alisema Charles.

Charles alipozidi kujitwika msimamo huo, dada mmoja aliyejitambulisha kwa jina la Aisha Rashid, alisema kuwa, naye anamuunga mkono James kwa kuwa kitendo hicho, ingawaje hakuwepo uwanjani, lakini kwa sasa kimekuwa gumzo kwa wadau mbalimbali hapa nchini.

“Tunakubali kuwa, Diamond ni mkali, lakini kama anatafuta umaarufu kwa kufanya uchawi sio ishu, mimi simsapoti hata kidogo kwa hilo, bora angefanya kama wenzake ambao walipanda bila ya kuonyesha vitu hivyo, iwapo kweli ni mchawi, basi ajue hayo yanamwisho wake,” alisema Aisha.

Akizungumzia tukio hilo, Diamond alisema, kuingia kwake Uwanja wa Taifa na njiwa wanne, ilikuwa ni sehemu ya burudani tu na ubunifu kwa ajili ya kuwafurahisha wadau na mashabiki waliokuja katika tamasha hilo kwa lengo la kuburudika.

“Kufanya kwangu hivyo, ni sehemu tu ya utashi na mbwembwe za kiburudani, si imani za kishirikina, kama ambavyo mashabiki na wapenzi wamekuwa wakifikiria,” alisema Diamond ambaye alipambana na mkali kutoka Uganda, Jose Chameleon.

Via Tanzania Daima