Wanawake 26 wafariki dunia wakijifungua

WANAWAKE 26 wamefariki dunia katika Wilaya ya Manyoni wakati wa kujifungua, huku sababu kubwa ikitajwa ni utumiaji dawa za kienyeji.

Wanawake hao walifariki dunia kipindi cha mwaka 2010/2011, eneo la Itigi likitajwa kuongoza kwa utumiaji dawa za kienyeji kwa lengo la kuharakisha kuzaa.

Hayo yalisemwa mwishoni mwa wiki iliyopita na Mratibu wa Afya ya Uzazi na Mtoto Wilaya ya Manyoni, Grace Mwegoha alipozungumzia utekelezaji wa Mradi wa Ushiriki Sawa kwa Wanaume katika Afya ya Uzazi na Jinsia (TMEP).

“Wanadanganyana sana, utakuta mama ameanza kuumwa uchugu anapewa dawa za kienyeji ili azae haraka hatimaye anakufa na mimba,”alisema Mwegoha na kuongeza:

“Itigi ndiyo wanaongoza, lakini tunajaribu kuwaelimisha na tukiwakamata tunawarudisha nyumbani.”
 

Mwegoha alisema kati ya vifo 14 vilivyotokea mwaka 2010, vitano vilisababsihwa na utumiaji dawa za kienyeji, mwaka jana vifo vya wazazi vilikuwa 12 na viwili vilisababishwa na matumizi ya dawa za kienyeji.

Alisema vifo vingine vilisababishwa na kifafa cha mimba, kutokwa na damu nyingi baada ya kujifungua, uambukizo baada ya kujifungua, malaria, upungufu wa damu, ugonjwa wa Ukimwi, maji kuingia kwenye mishipa ya damu na matatizo ya moyo.

Hata hivyo, Mwegoha alisema vifo hivyo havitabiriki kwani wakati mwingine vinapanda na kupungua.
Mratibu huyo alisema wanatarajia vifo hivyo vitapungua hasa baada ya ushiriki wa wanaume katika afya ya uzazi, kwasababu wanawake wengi walikuwa wanakosa matunzo mazuri kutoka kwa waume zao.

Naye Mganga Mkuu wa Wilaya ya Manyoni, Dk Antipas Swai alisema mradi huo umewasaidia kwasababu kazi zao nyingi zinahitaji uhamasishaji na kuelimisha wananchi, ili waelewe masuala mbalimnbali ya afya ya uzazi hasa kumhusisha mwanaume.

“Kwenye kliniki zetu maelekezo mengi yalikuwa yanatolewa kwa wanawake, lakini tuliona mengi yalikuwa hayafiki kwa wanaume,”alisema Dk Swai.

Alisema changamoto iliyopo ni kuweka mazingira ya kumfanya baba akienda kliniki aweze kushiriki vizuri, ili wanawake waone kama suala hilo ni jambo la kawaida.