UONGOZI wa klabu ya Simba umevunja rasmi mkataba wa Kocha wake mkuu, Mserbia Milovan Cirkovic na tayari amefungasha virago kurejea kwao.

Cirkovic, ameondoka nchini juzi usiku, kurujea kwao Serbia, baada ya kumalizana na uongozi wa klabu hiyo.Habari za uhakika kutoka ndani ya klabu hiyo zinaeleza kuwa, kocha huyo hatarejea tena nchini kuionoa Simba, kwani imeishavunja naye mkataba.

 

“Milovan aliingia mkataba wa miaka miwili kukinoa kikosi cha Simba Juni mwaka huu na katika masharti ya mkataba wake, yule atakayesitisha mkataba anapaswa kuulipa upande athirika mshahara wa mwezi mmoja mbele, hivyo uongozi wa Simba tayari umemalizana naye,” kilisema chanzo hicho huku kikigoma kubainisha sababu za kutemwa kwa Kocha huyo, aliyeipa Simba mafanikio haraka haraka ikiwamo kutwaa ubingwa wa Bara.

Mtoa habari huyo, ambaye aliomba jina lihifadhiwa, alibainisha kuwa, katika kikao cha Kamati ya Utendaji ya Simba kilichofanyika wiki iliyopita, kiliamua kuwateuwa Talib Hilal kuwa Kocha Mkuu na Jamhuri Kihwelu ‘Julio Alberto’ kukamata nafasi ya Meneja.

Hata hivyo, Julio alipoulizwa kuhusiana na uteuzi huo, alisema anasikia tu, ila hajapewa barua rasmi.

Julio alisema kuwa, hata hivyo hawezi kukubali kuifundisha klabu hiyo hadi atakapokaa na uongozi wa Simba kuupitia mkataba wake.

Kwa upande wake, Mwenyekiti wa Simba, Ismail Aden Rage, alithibitisha kuondoka kwa Cirkovic, lakini akidai amekwenda kupumzika.

"Tayari Kocha Milovan amekabidhi taarifa yake ya mzunguko wa kwanza wa ligi na ameshaondoka kwenda kusalimia familia yake nchini Serbia, "alisema Rage huku akishindwa kuweka wazi kama atarejea ama ndo moja kwa moja.

Simba imemaliza mzunguko wa kwanza wa Ligi Kuu Bara ikiwa nafasi ya tatu, baada ya kujikusanyia pointi 23 ikiwanguliwa na Azam FC pointi 24 na Yanga pointi 29.