MJERUMANI AITOA UDENDA MAN UTD

LONDON, ENGLAND

MANCHESTER UNITED inamuwinda Mjerumani Sven Bender kwa lengo la kuimarisha safu yake ya kiungo, limeripoti gazeti la Sunday Times.

Kiungo huyo wa miaka 23 ana thamani ya pauni milioni 15, na tayari ametazamwa mara kadhaa na wasaka vipaji wa Old Trafford wakati akiichezea timu yake ya Borussia Dortmund.

Sir Alex Ferguson, ambaye ametangaza kujiondoa katika soko la usajili la Januari, anaweza kuanza taratibu za kumnasa katika usajili wa majira ya kiangazi.

Msimu wa Bender umeingiliwa na majeruhi, na Dortmund walio mabingwa watetezi wa Bundesliga, wanahangaika kwa kutokuwapo kwake, ambapo wako nyuma ya vinara Bayern Munich kwa pointi 12.

Ferguson aliripotiwa kukunwa na mchango wa Bender katika ulinzi na anamuona kama pacha sahihi kwa Michael Carrick.

Kiungo wa PSV ya Uholanzi, Kevin Strootman, ambaye yupo kwenye rada za Liverpool, anaweza kuwa mbadala kama uhamisho kwa nyopta huyo wa kimataifa wa Ujerumani utashindikana.