Okwi aikoroga Simba

MSHAMBULIAJI wa kimataifa wa Simba, Mganda, Emannuel Okwi, huenda akaadhibiwa na klabu yake ya Simba kwa kushindwa kujiunga kwa wakati na wenzake walioko Zanzibar wakishiriki michuano ya Kombe la Mapinduzi litakalofikia kilele Januari 12.

 

Katibu Mkuu wa Simba, Evodius Mtawala, alisema jijini Dar es Salaam jana kuwa, Okwi alitakiwa kuwasili nchini na kujiunga na kambi Januari 2, lakini ameshindwa kufanya hivyo bila ya kutoa taarifa kwa uongozi.

Mtawala alisema, kutokana na nyota huyo kushindwa kufika nchini kwa muda muafaka sambamba na kugoma kupokea simu anapopigiwa, uongozi umeamua suala hilo kulipeleka katika benchi la ufundi, ambalo litapendekeza hatua ya kuchukuliwa nyota huyo.

Aidha, Mtawala alifafanua kuwa, uamuzi huo sio kwa mchezaji huyo pekee, bali yeyote anayefanya vitendo hivyo vya utovu wa nidhamu atakutana na rungu la utawala.

"Sisi kama uongozi tumemuachia Meneja, Moses Bassena na tunaamini atakuwa makini katika suala hili, hivyo Okwi atatakiwa kutoa sababu zinazofanya ashindwe kupokea simu na zinazofanya asije kambini, huku akijua Ligi inakaribia kuanza na timu iko katika michuano ya Mapinduzi," alisema Mtawala.

Katika hatua nyingine, Mtawala alisema, kwa kuwa timu yao inashiriki michuano ya Mapinduzi, kuna uwezekano wa kikosi chao kikaondoka nchini kwenda kujinoa nchini Oman Januari 13, siku moja baada ya kumalizika kwa mashindano hayo endapo timu itakuwa imeingia fainali.

Kuhusiana na kibali cha kocha wao mpya, Mfaransa Patrick Liewig, alisema kuna uwezekano wa kupatikana Jumatatu au Jumanne ijayo kama mambo yatakwenda vizuri.