RC awaonya polisi kutumia mabavu

MKUU wa Mkoa (RC) wa Kagera, Kanali mstaafu Fabian Masawe, amekemea vitendo vya askari polisi kutumia nguvu kubwa katika kukabiliana na raia wema pamoja na kuwanyima haki zao.

Mkuu huyo wa mkoa alitoa kauli hiyo ofisini jana alipozungumza na waandishi wa habari alipokuwa akitoa salamu za mwaka mpya 2013 kwa wananchi wa mkoa huo.

Alisema wananchi wamekosa imani na serikali kutokana na baadhi ya watendaji wake na walioko katika kutumikia vyombo vya dola kukiuka maadili ya utumishi na kusababisha uvunjifu wa amani.

Aliwasihi wakuu wa wilaya ambao ni wenyeviti wa kamati za ulinzi na usalama kufanya kazi karibu na wananchi na kusikiliza kero zao kisha kutafuta ufumbuzi, ili wapate haki zao ikiwa ni pamoja na kupata huduma za kijamii.

“Kitendo cha kukiuka miiko ya kazi kwa watumishi wa vyombo vya dola na kuvunja sheria kimewafanya wananchi kujichukulia sheria mikononi na kusababisha uvunjifu wa amani katika maeneo yao na hii ni hatari kwa usalama wa taifa,” alisema Kanali Masawe.

Kutokana na hali hiyo, Masawe aliahidi kufa na kupona na watumishi wote watakaobainika kuwanyanyasa wananchi kwa kukiuka maadili ya kazi katika mkoa huo na kwamba wananchi wanatakiwa kuishi kwa amani, ili iwe rahisi kwao kujiletea maendeleo.

Aidha, aliwashauri wananchi kuepuka vitendo vya kulipa visasi na kujengeana chuki pamoja na imani za kishirikina na badala yake waoneshe upendo, mshikamano na ushirikiano kwa watendaji waadilifu, ili kulinda usalama wao na taifa kwa ujumla.

Katika hatua nyingine, aliwaagiza wakuu wa wilaya kwa kushirikiana na Idara ya Uhamiaji kuhakikisha wahamiaji haramu walioko katika wilaya zao wanaondoka kabla ya msako utakaojumuisha kuondoa mifugo haramu iliyoko ndani ya mapori ya hifadhi ndani ya mkoa huo haujaanza.