Rage kwenda kwanza kutibiwa India

Wakati mashabiki wa Simba wakitaka kuitishwa kwa Mkutano Mkuu wa klabu hiyo mara moja, Mwenyekiti wao Aden Rage amesema anakwenda kwanza India kwa ajili ya matibabu hivyo, wanachama wametakiwa kuvuta subira.

 

Wiki iliyopita uongozi ulitangaza kuitisha mkutano wa dharura kujadili mwenendo mbaya wa timu hiyo kwenye Ligi Kuu Bara. Mwishoni mwa wiki iliyopita Simba iliondolewa michuano ya Ligi ya Mabingwa Afrika baada ya kufungwa mabao 4-0 na Libolo ya Angola.

Rage aliiambia Mwananchi kuwa, kwa sasa akili yake ameielekeza kwenye matibabu nje ya nchi, hivyo uongozi hauwezi kuitisha mkutano kwa sasa mpaka atakaporejea kutoka India.

"Nitawaeleza mwenyewe wanachama wangu na siyo vyombo vya habari. Muhimu kwanza ni afya, mambo mengine yatafuata. Wakati wowote kuanzia sasa nakwenda India, natumaini watanivumilia," alisema Rage.

Rage pia alipinga wachezaji wa timu yao kulaumiwa kutokana na matokeo mabaya wanayopata kwenye mechi za ligi na badala yake amewataka wanachama kuwatia nguvu kwani bado wana mechi za ligi.

"Unajua kwa sasa kila mmoja atapeleka lawama kwa uongozi na wachezaji, lakini wanapaswa kutambua hao ni binadamu na makosa ya uwanjani yapo. Ni vizuri wakawavumilia," alisema Rage.