Kayuni: Wachezaji wa soka nchini kutotumia dawa za kulevya kama bangi.

MKURUGENZI wa Ufundi wa Shirikisho la Soka Tanzania (TFF), Sunday Kayuni, amewasihi wachezaji wa soka nchini kutotumia dawa za kulevya kama bangi ikiwa wanataka kupata mafanikio ya kweli katika mchezo huo.

Mbali ya bangi, Kayuni amewasihi wachezaji wenye malengo ya kufika mbali katika mchezo huo kuachana na imani za kishirikina kwani vitu hivyo havina nafasi katika soka.

Kayuni ambaye ni kocha wa soka kitaaluma aliyewahi kufundisha timu mbalimbali ndani na nje ya Tanzania, aliyasema hayo jana katika semina ya siku moja ya wachezaji na viongozi wa klabu sita za Mkoa wa Dar es Salaam zinazoshiriki Ligi Daraja la Pili ngazi ya kanda iliyoanza jana hadi Aprili 31.

Kayuni alisema imani potofu za ushirikina na matumizi ya bangi ni hatari inayoikabili soka ya Tanzania na kuwataka wachezaji wa timu hizo na nyingine nchini kuyaepuka hayo yanayowavunjia heshima mbele ya jamii.

“Ninawaomba viongozi mtambue majukumu yenu na kuepuka kufanya au kuingilia mambo yasiyo wahusu, kwani kama mtaheshimiana hali inaweza kuwa nzuri katika soka, hususan ndani ya Mkoa wenu wa Dar es Salaam, pia wachezaji muwe na nidhanmu nzuri ili muweze kufanikiwa katika malengo yenu kiuchezaji,” alisema Kayuni aliyewahi kuwa Mwenyekiti wa Chama cha Makocha wa Soka (Tafca).

Akizungumzia semina hiyo, Katibu Mkuu wa DRFA, Msanifu Kondo, alisema inalenga kuwaongezea uelewa viongozi wa timu kwa maana ya manahodha na viongozi wa klabu katika kukuza ufanisi wa utendaji kazi katika kuendeleza soka kwenye mkoa huo.

Timu zinazoshiriki hatua ya sita bora iliyoanza jana ni Boom FC, Friends Rangers, Abajalo FC, Red Coast, Dar Break na Shariff Stars ambazo zitakuwa zikitumia viwanja vya Sekondari ya Benjamin Mkapa, Kinesi na Makulumla.