Raia wa Kenya afariki dunia ghafla hotelini.

RAIA wa Kenya, Eric Njoroge Waisaka, amefariki dunia katika mazingira ya kutatanisha kwenye Hoteli ya Sleep Inn iliyopo mtaa wa Mahiwa na Lumumba, jijini Dar es Salaam.

Tayari ndugu wa marehemu wameshawasili jijini Dar es Salaam, kwanza kwa ajili ya kujua sababu za kifo na kushughulikia taratibu za kuuchukua mwili huo huku viongozi wa hoteli wakitupiana mpira kuzungumzia tukio la kifo chake.

Habari ambazo chanzo hiki kilizipata, zilisema kuwa raia huyo wa Kenya aliingia hotelini hapo Jumamosi iliyopita na siku iliyofuata alikutwa amekufa akiwa kwenye choo cha chumba alichofikia katika hoteli hiyo.

Meneja wa hoteli  hiyo aliyejulikana kwa jina moja la Zarina, alipopigiwa simu juu ya tukio hilo alisema hayupo katika nafasi nzuri ya kuzungumzia kwa kuwa yupo msibani jijini Tanga.

“Mimi siku ya tukio nilikuwa nyumbani hivyo nimeambiwa kama wewe na kwa sasa nipo msibani, Tanga tafadhali wasiliana na ofisini watakuwa na jambo la kukueleza,” alisema Zarina.

Mkurugenzi wa hoteli hiyo, Muslim Meghy, alipopigiwa simu alisema suala hilo hawezi kulizungumzia kwa kuwa halijawa na uzito wa kuzungumziwa katika nafasi yake.

Alimweleza mwandishi wa habari hizi awasiliane na meneja na alipoambiwa kuhusu majibu ya meneja wake, mkurugenzi huyo aliomba apigiwe simu siku iliyofuata, lakini hakuweza kupokea simu yake kila alipopigiwa.

Kamanda wa Polisi wa Mkoa wa Ilala, Marietha Minangi, amethibitisha kutokea kwa tukio hilo na kusema taarifa za awali zinaonesha mtu huyo alizidiwa na shinikizo la damu.

Mwili wa marehemu ulihifadhiwa katika Hospitali ya Taifa Muhimbili na kisha kurejeshwa kwao Kenya kwa mazishi.