Auawa kwa kupigwa risasi baa.

JESHI la Polisi Mkoa wa Kinondoni linamshikilia Conrad Leo kwa tuhuma za kumpiga risasi na kumuua Ayoub Mlay (38), wakati wakiwa katika klabu ya Ambrosia iliyoko Mbezi Beach, jijini Dar es Salaam.

Baadhi ya mashuhuda wa tukio hilo wameliambia Tanzania Daima Jumapili kuwa mtuhumiwa huyo alishawahi kupokonywa silaha yake kabla ya kurudishiwa katika mazingira ya kutatanisha siku za hivi karibuni.

Inadaiwa kuwa sababu za awali zilizosababisha mtuhumiwa huyo kupokonywa silaha hiyo na Jeshi la Polisi ni pamoja na matumizi mabaya ikiwamo kuwatishia watu kila wakati wanapotofautiana kwa kauli.

Kamanda wa Polisi Mkoa wa Kinondoni, Charles Kenyela amethibitisha kutokea kwa tukio hilo akisema kuwa mtuhumiwa akiwa katika klabu ya Ambrosia jijini Dar es Salaam, alimfyatulia Mlay risasi katika eneo la kifua, baada ya kutokea mabishano kati yao na kusababisha kifo chake.

Alisema taarifa juu ya mtuhumiwa huyo kuwahi kupokonywa silaha yake na Jeshi la Polisi Mkoa wa Kinondoni na baadaye kurejeshewa katika mazingira ya kutatanisha hana uhakika nazo na aliahidi kufuatilia.

“Kwa sasa mtuhumiwa anashikiliwa katika kituo cha Polisi Kawe na tutachunguza hilo la kunyang’anywa bastola na kama lipo tutaangalia sababu za msingi za kurudishiwa silaha hiyo katika mazingira yanayoelezwa kuwa ya kutatanisha,” alisema Kenyela.