Afya ya Mandela yazidi kudorora

Pretoria. 
Ikulu ya Afrika Kusini imetoa taarifa kuwa hali ya Rais wake wa zamani, Nelson Mandela imezidi kuwa mbaya katika siku mbili zilizopita.

Taarifa hiyo ilithibitishwa na Rais Jacob Zuma ambaye kwa mara ya kwanza alikiri hadharani kwamba hali ya afya ya Mandela ni mbaya na madaktari wanaendelea na juhudi za kuokoa maisha yake.

Zuma ambaye pia ni Rais wa Chama cha African National Congress (ANC), alikiri kufadhaishwa na hali ya kiongozi huyo wa zamani, alipomtembelea katika Hospitali ya Magonjwa ya Moyo ya Medi-Clinic mjini Pretoria na kuzungumza na mkewe, Graca Machel kuhusu hali yake.

Kumekuwa na taarifa kwamba tangu alipofikishwa hospitali, Mandela amekuwa hajitambui na amekuwa akipumua kwa msaada wa mashine.

Pia, kumekuwa na ulinzi mkali katika hospitali hiyo alikolazwa huku waandishi wa habari na watu wasiokuwa wanafamilia wakizuiwa kwenda kumwona.

Ilielezwa pia kwamba ulinzi ulizidi kuimarishwa jana katika maeneo yanayozunguka hospitali hiyo.

ANC ambacho ndicho chama kinachotawala Afrika Kusini, pia kilitoa taarifa yake jana asubuhi kikielezea wasiwasi kuhusu afya ya kiongozi wake huyo wa zamani maarufu kwa jina la Madiba kuzidi kuwa mbaya.

Msemaji wa chama hicho, Jackson Mthembu aliwataka wananchi wa Afrika Kusini na dunia kwa jumla kuwaombea Mandela, ndugu zake na madaktari.

Hatua hiyo imesababisha simanzi na majonzi kwa wananchi wa Afrika Kusini ambao wamekuwa wakimwombea na kutoa salamu za kumtakia afya njema.

Mandela alilazwa katika Hospitali ya Moyo ya Medi-Clinic, Juni 8, mwaka huu kutokana na maradhi ya homa ya mapafu yanayomsumbua na iliripotiwa kwamba tangu wakati huo hajitambui.

Hatua ya Serikali kupitia Ofisi ya Rais Zuma kutangaza kwamba hali ya Mandela ni mbaya, imeongeza wasiwasi kwa wananchi na wengi wameitikia wito wa kuendelea kufanya maombezi maalumu kwa Mandela.

Hata hivyo, ofisa mmoja mwandamizi wa Serikali ambaye hakutaka kutajwa jina lake alisema kwa sasa hali ya Madiba si nzuri na kwamba wananchi wa Afrika Kusini wasiwe na matumaini kupita kiasi kuhusu kuimarika kwa hali ya afya yake.

Awali, wiki iliyopita Rais Zuma alisema madaktari wanafanya kila linalowezekana ili kuirejesha afya yake na kwamba anaangaliwa vizuri sana.

Zuma ambaye alieleza wasifu wa Mandela na kusema kwamba anaamini mpiganaji huyo hawezi kukubali kufa kirahisi alisema, madaktari wanafanya juhudi zote kumsaidia.

Pia alirejea kauli yake ya kulitaka taifa na dunia kumwombea apate nafuu. Vyombo vya habari nchini humo na hata vya kimataifa vilidai kwamba Mandela alizidiwa tena juzi usiku kiasi cha kushtua umati wa watu waliokuwa wakimwombea nje ya Hospitali hiyo.

Msemaji wa Ikulu ya Afrika Kusini, Mac Maharaj pia alisema hali ya Mandela ilikuwa ni mahututi.