Tanzania yaongoza kwa vifo vya watoto wachanga

IMEELEZWA kuwa Tanzania inaongoza kwa vifo vya watoto vinavyotokea siku ya kwanza ya kuzaliwa, kwa nchi za Afrika Mashariki huku kwa Afrika ikiwa ni ya tatu.

Mbali ya kuwa ya tatu katika Afrika baada ya nchi ya Nigeria na Jamhuri ya Kidemokarsia ya Congo (DRC) pia ni miongoni mwa nchi 10 zenye idadi kubwa ya vifo vya watoto vinavyotokea siku ya kwanza ya kuzaliwa ulimwenguni kote.

Taarifa hiyo imetolewa jana na Mshauri wa Programu ya Afya wa Save the Children nchini Tanzania Stephen Ayella wakati akizungumza na waandishi wa habari jijini Dar es Salaam.

Ayella alisema Tanzania inachangia asilimia 2 ya vifo vinavyotokea siku ya kwanza ya kuzaliwa ulimwenguni, ambavyo huchangiwa zaidi na matatizo ya uzazi kabla ya muda wa kujifungua.

Alitaja sababu zingine kuwa ni ukosefu wa vifaa vya kujifungulia na changamoto za kupata huduma kwa watoto wachanga, hususan kwa kina mama wanaoishi maeneo ya vijijini.

Alisema kuwa katika ripoti ya hali ya afya ya mama na mtoto ya mwaka 2013 Tanzania imefanya mabadiliko makubwa ya kisera katika kupanua huduma za afya kwa watoto wanaozaliwa.

Ayella alisema kuwa watoto milioni 1 hufa kila mwaka katika siku yao ya kwanza ya kuzaliwa ama kwa lugha nyingine watoto wawili hufa kila dakika, hivyo kuifanya siku ya kwanza kuwa siku ya hatari zaidi kwa maisha ya wa watoto hao wanaozaliwa.