Wadau waponda bajeti ya elimu

WADAU mbalimbali wa sekta ya elimu nchini wameikosoa bajeti ya Wizara ya Elimu na Mafunzo ya Ufundi, iliyosomwa jana bungeni mjini Dodoma na kusema haina mwelekeo wa kutatua matatizo ya elimu yaliyoko nchini.

Wakizungumza kwa nyakati tofauti jana wadau hao walisema kuna mambo mengi hayajapewa kipaumbele kuweza kukwamua sekta nzima ya elimu.

Miongoni mwa wadau hao ni Mkurugenzi wa Haki Elimu, Elizabeth Missokia, ambaye alisema licha ya wadau kuonyesha njia ya kukwamua sekta ya elimu serikali haikujishughulisha kuyafanyia kazi mawazo hayo katika bajeti yake.

Aliyataja mambo ambayo hayakutiliwa mkazo kuwa ni kuwajengea uwezo walimu pamoja na suala zima la lugha.

Msokia alisema bajeti haikutoa njia za kutatua changamoto mbalimbali kama vile ununuzi wa vifaa mashuleni, vitabu na ujenzi wa maabara sambamba na maboresho ya posho na mishahara ya walimu.

Kwa upande wake Mhadhiri Mwandamizi wa Chuo Kikuu cha Dar es Salaam, Dk. Kitila Mkumbo, alisema bajeti haijatenga fedha zozote kwa ajili ya wanafunzi wa vyuo vikuu kufanya utafiti jambo alilosema ni hatari kwa taifa kwa kile alichoeleza kuwa kila kukicha elimu ya juu inashuka.

“Hii haijajibu kiu ya watu wengi ambao walitaka kujua sababu za kufeli kwa wanafunzi lakini mimi naamini kuwa kuna mambo mawili tu ikiwa ni pamoja na kutokuwa na motisha kwa walimu wala mishahara inayoeleweka kwa kuwa walimu ndio wanaolipwa mishahara midogo sana,” alisema Dk. Mkumbo.

Alisema hotuba ya bajeti haijaonyesha wizara imejifunza nini kutokana na matukio yaliyopita.

Naye mwakilishi kutoka Mtandao wa Elimu Tanzania (TenMet) Antony Mwakibinga alisema kuwa tatizo la serikali ni kutojifunza kutokana na makosa na kuweka mikakati mbalimbali ya muda mrefu ili kuweza kuikomboa elimu.