Diwani, mtendaji wa kijiji watuhumiwa kufuja fedha.

WANANCHI wa kijiji cha Hungumalwa kata ya Hungumalwa, wilaya ya Kwimba, mkoani Mwanza, wameshutumu Diwani wa kata hiyo, Shija Malando (CCM), na Ofisa Mtendaji wa kijiji, Johansen Malifedha, kuhujumu fedha za miradi ya maendeleo.

Kutokana na hali hiyo, wananchi hao wamemtaka Mkuu wa Wilaya ya Kwimba, Seleman Mzee, kwenda kijijini hapo Jumatatu ijayo, ili akaelezwe tuhuma za matumizi mabaya ya fedha za umma.

Wakizungumza juzi kwenye mkutano wa hadhara uliofanyika viwanja vya shule ya msingi, Ng'washikuga, wananchi hao walidai mtendaji Malifedha na diwani huyo wanashiriki kuhujumu fedha za maendeleo.

Walidai kuwepo kwa hujuma za miradi ya soko, stendi ya magari katika eneo lililowekwa miaka mingi iliyopita, na kwamba kwa sasa miradi hiyo imehamishiwa maeneo mengine kinyemela bila wananchi kushirikishwa.

“Huyu Ofisa Mtendaji hatumtaki hapa aondoke. Kwa nini anang’ang’ania kwenye kijiji chetu? Sisi wananchi wa Hungumalwa hatutaki viongozi wabovu,” walisikika wakisema wananchi hao.

Ofisa mtendaji huyo wa kijiji cha Hungumalwa, Malifedha alipoulizwa kuhusiana na tuhuma hizo, alisema hazina ukweli wowote bali zimepandikizwa na viongozi watatu wa kata hiyo ili afukuzwe kazi kijijini hapo.

"Kwanza mpaka sasa hivi maisha yangu yako hatarini. Hivi karibuni nimelishwa sumu, na nilihangaika nayo kwa siku tatu. Kwa hiyo msimamo wangu itanibidi niondoke kwenye kijiji hiki ili kuokoa maisha yangu," alisema Malifedha.

Naye Diwani wa kata hiyo, Malando, alikanusha kuhusika na ubadhirifu wa fedha zozote za umma, na kusema fedha za miradi ya vijiji zinasimamiwa na viongozi wa serikali ya vijiji husika, na wala yeye si mjumbe wala muweka saini kwenye akaunti ya benki.

“Tuhuma hizo ni njama tu ambazo zimepandikizwa kisiasa. Mimi kwanza siyo mjumbe kwenye serikali za vijiji na wala si muweka saini kwenye benki. Sasa hizo fedha nachukuaje?” alihoji.