Kili: Stars itafanya maajabu Kampala.

WADHAMINI wa timu ya taifa ‘Taifa Stars’, Kilimanjaro Premium Lager, wamesema wana imani timu hiyo itafanya vizuri katika mechi ya marudiano dhidi ya Uganda ‘The Cranes’ kuwania kufuzu Fainali za Mataifa ya Afrika kwa Nyota Wanaocheza Ligi za Ndani (CHAN), kwani maandalizi ni mazuri.

 

Hayo yalisemwa na Meneja wa Kampuni ya Bia Tanzania (TBL), Kanda ya Ziwa, Malaki Sitaki, wakati TBL Mwanza ilipowaandalia chakula cha jioni wachezaji wa Stars.

Malaki aliishukuru TFF kwa kuichagua Mwanza tena iwe kambi ya Stars, kwani wakaazi wa jiji hilo wanaipenda timu yao na wamekuwa wakijitokeza kwa wingi kuangalia wachezaji wakiendelea na mazoezi chini ya Kocha Kim Poulsen.

“Tuna imani mtafanya vizuri ili twende CHAN….kama Waganda walitufunga bao moja kwetu, sisi tuna uwezo wa kuwafunga mawili kwao,” alisema Malaki.

Alisema kocha amefanya kazi nzuri tangu aanze kuifundisha timu ya taifa na anastahili pongezi kwa mafanikio aliyopata hadi sasa.

“Baadhi ya matunda tuliyoyaona ni kuwafunga vigogo kama Zambia, Cameroon na Morocco,” alisema na kuongeza kuwa Kilimanjaro Premium Lager iko pamoja na Stars, kwani ushirikiano uliopo ni wa manufaa kwa pande zote.

Naye Mkurugenzi wa Mashindano wa TFF, Saad Kawemba, aliipongeza Kilimanjaro Premium Lager kwa kuwa karibu na Taifa Stars wakati wote.

Alisema matokeo ya awali ya Stars kufungwa bao moja yasiwakatishe wachezaji na wananchi tamaa, kwani kilichotokea ni matokeo ya mpira na Stars inaweza kugeuza meza ikiwa Kampala.

Alisema Stars ilivyopiga kambi Mwanza mwaka jana kabla ya kwenda kwenye mashindano ya CECAFA ilishinda mechi tatu mfululizo kwa hiyo wanaamini safari hii pia kutakuwa na matokeo mazuri Kampala Jumamosi Julai 27, Stars itakapocheza na Cranes katika mechi ya marudiano.

Naye Poulsen alisema wachezaji wako katika hali nzuri na ana imani watafanya kazi nzuri Kampala.