Vijana wataka viongozi wa dini kuruhusu kondomu

MAJADILIANO makubwa yameibuka kati ya vijana na viongozi wa kidini, wakitaka viongozi hao wasiendelee na msimamo wao wa kupinga matumizi ya kondomu kwa madai waumini wao wengi wanaangamia kwa ugonjwa wa ukimwi.

Katika majadiliano hayo, vijana wanataka viongozi wao kutambua kwamba kwa kipindi kirefu wamekuwa wakiwahubiria waumini wao kuacha zinaa, lakini bado wanaendelea na na zinaa zinazochangia kuambukizwa virusi vya ukimwi.

Balozi wa vijana, Suleiman Msei, alisema waumini wengi wamekuwa wakionyesha maadili mazuri kwa viongozi wao, lakini baada ya kutoka kanisani au msikitini wamekuwa wakifanya vitendo visivyo vya maadili.

Alisema ni vigumu kiongozi wa dini kutamka hadharani kuruhusu matumizi ya kondomu, lakini kutokana na hali halisi vijana ambao ndio waathirika wakubwa, wangeona vema kama elimu ya suala hilo isingewekewa kipingamizi kwa kuwa wengi wameshindwa kumtii Mungu.

Akijibu hoja za vijana hao, Imamu wa Msikiti wa Barabara ya 10 jijini Tanga, Mohamed Yahya, alisema kitendo cha kuruhusu matumizi ya kondomu ni kuhamasisha zinaa kwa waumini suala ambalo linapingwa katika dini zote.

“Sisi kama viongozi wa kidini tutazungumzia watu kuacha zinaa, kuruhusu matumizi ya kondomu ni sawa na kuwafanya waumini tulionao ambao ni waadilifu, nao kujihusisha na vitendo vya zinaa,” alisema Imamu Yahya.