Wachina waukabidhi rasmi Uwanja wa Taifa kwa Serikali.

JESHI la Polisi Kanda Maalumu ya Dar es Salaam, wametuhumiwa kuwa kaburi la mapato ya viingilio vya mlangoni katika Uwanja wa Taifa jijini Dar es Salaam.

Hayo yalibainishwa jijini Dar es Salaam jana na Katibu Mkuu wa Shirikisho la Soka Tanzania (TFF), Angetile Osiah, wakati Balozi wa China nchini, Lu Youqung, akikabidhi rasmi uwanja huo kwa Serikali ya Tanzania.

Alisema kumekuwa na ongezeko kubwa la watazamaji wanaoingia uwanjani bila tiketi halali kutokana na uaminifu mdogo wa baadhi ya askari wa jeshi hilo ambao wamekuwa wakiwapitisha watu hovyo na kujipatia fedha licha ya kulipwa posho kwa kazi hiyo.

“TFF tumekuwa tukilaumiwa kutangaza mapato tofauti na idadi ya watazamaji wanaoonekana uwanjani, jambo hili halituhusu sisi kwa kuwa hiyo ni kazi tuliyoikadhi kwa askari 350, lakini pamoja na wingi wao, bado watu wanaingia bila tiketi,” alisema Osiah.

Mbali ya kulinyooshea kidole moja kwa moja Jeshi la Polisi kuhusika na kuingiza watu kwa njia za panya, Osiah amewataka watumiaji wote kujenga utamaduni wa kulipa kiingilio halali.

“Tumewahi kuwakamata watuhumiwa kadhaa wakiwemo askari polisi, lakini hakuna hatua walizochukuliwa, wanaachwa bila sisi kufahamu, pia hatuwezi kuwashitaki Polisi kwa vile ni wao kwa wao,” alisema Osiah.

Osiah aliyasema hayo baada ya Waziri wa Habari, Vijana, Utamaduni na Michezo, Dk. Fenella 

 Mukangara, kukabidhiwa rasmi uwanja huo jana na Balozi wa China, Youqung, baada ya ujenzi huo uliodumu kwa miaka saba.

Waziri Mukangara kwa upande wake, aliwasihi watumiaji wa uwanja huo kwa mechi za soka, matamasha na matukio mengineyo kutoa takwimu sahihi badala ya kufanya udanganyifu.

“Watumiaji wa uwanja huu kuanzia mechi za soka, mashindano mbalimbali na matamasha, wanatakiwa kutoa takwimu sahihi za viingilio ili mradi wa uwanja huu uwanufaishe wananchi wote.

Alisema licha ya uwanja huo kuwa na uwezo wa kuingiza watu 60,000, hata ikitokea umejaza watu mapato yanayotangazwa hayaendani na wingi wa watu walioufurika uwanjani.

“Tunapaswa kulinga na kujivunia uwanja wetu wa kimataifa ambao utatuingizia mapato makubwa na kuinua uchumi wetu, kuongeza ajira na kutuwezesha kuandaa mashindano makubwa ambayo yatakuza utalii wetu na kuliletea sifa kubwa taifa letu,” alisema Mukangara.

Mukangara aliongeza kuwa umefika wakati wa Watanzania kujenga utamaduni wa kulinda rasilimali yao kwa kuitunza na kuithamini hivyo akasema anachukizwa na tabia ya baadhi ya mashabiki kuharibu miundombinu ya uwanja huo ikiwemo kung’oa viti. Waziri huyo alisema kama Watanzania wataujali uwanja huo unaweza kutumika kwa muda mrefu zaidi na kuwasihi waache tabia ya kuchafua vyoo kwa makusudi na uharibifu mwingine wa uwanja huo ambao ni mali ya wote.

Waziri Mukangara, aliishukuru Serikali ya China kwa mchango wao mkubwa walioufanya akisema Tanzania itaendelea kudumisha ushirikiano kati ya nchi hizo mbili.