Wanaume wanaohudhuria kliniki watunukiwa vyeti.

KATIKA kuhamasisha wanaume kujenga tabia ya kuwasindikiza wenza wao kliniki, Halmashauri ya Nkasi, mkoani Rukwa, imeweka utaratibu wa kuwatunukia vyeti maalumu wanaume wanaofanya hivyo.

Hayo yameelezwa na mratibu wa mradi wa ushiriki wa wanaume katika afya ya uzazi wilayani Nkasi, Nestori Sendani, wakati akiwasilisha taarifa kwa waandishi wa habari waliokwenda hivi karibuni kujionea utekelezaji wa mradi huo kwa ufadhili wa Chama cha Uzazi cha Sweden (RFSU).

Sendani alisema kutokana na hatua hiyo, idadi ya wanaume wanaohudhuria kliniki imeongezeka kutoka 239 Januari mwaka huu hadi 520 Mei mwaka huu, ongezeko ambalo ni tofauti na walivyotarajia.

Mratibu huyo aliongeza kwamba tangu kuanza kutolewa kwa elimu, wanaume wamebadilika kitabia tofauti na ilivyokuwa awali ambako suala la kwenda kliniki lilionekana ni la kinamama peke yao.

Mganga Mfawidhi wa Zahanati ya Kijiji cha Swahila, Kata ya Mkwamba, Khamis Hassan, alisema tangu TMEP iingie kijijini hapo, imeongeza kwa kiasi kikubwa upendo ndani ya familia, na akaomba waongezewe muda.

Alidai kwamba awali wakati mafunzo hayo ya ushiriki wa wanaume kwenye afya ya uzazi yalipokuwa yakitolewa kituoni hapo, waliona kama wanatukanwa kwa kuwa ni utamaduni ambao ulikuwa haujazoeleka.

Hassan alisema kuwa katika kufikisha elimu hiyo wamekuwa wakitumia mbinu mbalimbali za kufikisha ujumbe ikiwemo kuwatumia wazee maarufu na viongozi wa dini na pale mwanaume anapoonekana kumsindikiza mwenza wake kliniki hupewa kipaumbele katika kuhudumiwa tofauti na mama aliyekuja peke yake.

Karison Masebo, mwalimu wa Shule ya Msingi Swahila, alisema kupitia mradi huo kesi za mimba mashuleni zimepungua kwa kiasi kikubwa. Kwa mwaka jana walipata kesi tatu tu tofauti na huko nyuma ambako kila mwaka wasichana sita hadi nane walikuwa wakifukuzwa shule kutokana na kupata ujauzito.

Pia Masebo alisema kwa sasa vijana wamekuwa wazi kuelezea afya zao na kwa wale wanaohitaji kondomu wamekuwa wakienda kuzichukua kwa waelimishaji rika bila ya woga.